Analisti Edvin Kulluri, i ftuar në studion e emisionit “Kjo Javë” në News24, ka lëshuar deklarata tejet të forta lidhur me protestën qytetare që po dridh kryeqytetin.
Kulluri e cilësoi situatën aktuale në Shqipëri si një ngulfatje të klasës së mesme nga një strukturë e korruptuar, ndërsa foli për kryeministrin Edi Rama dhe liderin e opozitës Sali Berisha, të cilët sipas tij sillen si monarkë të përjetshëm.
Analisti ndau një detaj personal për të treguar se sa e pritshme dhe e domosdoshme ishte kjo revoltë për qytetarët e thjeshtë dhe profesionistët që ndihen të nëpërkëmbur nga arroganca e pushtetit.
“Këtu është krijuar një kupolë politiko-ekonomiko-kriminale që i ka marrë shpirtin Shqipërisë dhe klasës së mesme. Kjo njerëzit i acaron. Ime shoqe është profesioniste, kam 3 vite që e dëgjoj të thotë pse nuk del një protestë e tillë si kjo. Kush është Edi Rama që të thotë do iki kur të dua unë? Këtë e ka thënë Luigji XIV, që i prenë kokën pastaj! Ai e di shumë mirë këtë,” deklaroi Kulluri.
Më tej, Kulluri bëri një paralelizëm mes udhëheqësve aktualë të politikës shqiptare dhe monarkive më të egra të mesjetës, duke vënë në dukje mungesën e kontrollit dhe vetëpërmbajtjes prej tyre.
“Edhe monarkitë e mesjetës kanë pasur një kufizim, ligjin hyjnor dhe moral. As mbretërit nuk bënin çfarë të donin. Edhe ky tjetri që thotë do vdesë në krye të PD, Berisha…” u shpreh analisti, duke goditur kështu të dyja palët e establishmentit politik.
Në mbyllje të analizës së tij, Edvin Kulluri dha edhe strategjinë se si kjo lëvizje qytetare mund të arrijë qëllimet e saj, duke kërkuar që ditët në vijim bulevardi të mbushet edhe nga qytetarët që do të vijnë nga rrethet e tjera të Shqipërisë.
“Unë shpresoj që në ditët në vijim të ketë pjesëmarrje edhe nga rrethet. Protesta duhet të rrijë në bulevard. Qeveria bie në kryeqytet,” përfundoi Kulluri.
