Mungesa e mbikalimeve dhe nënkalimeve detyron banorët bashkë me bagëtitë të kalojnë përmes autostradës Levan-Tepelenë, duke krijuar situata të vazhdueshme rreziku.
Po aq problematike mbetet edhe shpejtësia e lartë e mjeteve, si dhe hyrje-daljet që lidhin fshatrat me aksin kryesor.
Përgjatë kësaj autostrade, në fshatrat Kafaraj, Cakran dhe Frakull, banorët thonë se mungojnë kalimet e sigurta.
“Është problem sepse të gjitha tokat bujqësore, më të shumtat janë në autostradë. Njerëzit ikin në punë, kalojnë bagëti. Është e nevojshme të ishte një nënkalim.”
- “Kjo rruga është problematike se s’ka rrethrrotullim dhe kanë humbur jetën disa njerëz”, thonë banorët.
Edhe Policia Rrugore e Fierit e konsideron këtë aks ndër më problematikët.
Drejtuesit e mjeteve lëvizin me shpejtësi mbi normat e lejuara dhe kryejnë parakalime të rrezikshme. Situata bëhet edhe më shqetësuese gjatë sezonit veror, kur trafiku drejt jugut të vendit rritet ndjeshëm.
- “Ky aks rrugor ka problematikë të shtuar për aksidentet. Normat e sigurisë rrugore, lëvizin pa rrip sigurimi apo bëjnë manovra të gabuara”, thotë shefi i qarkullimit Rustem Plaka.
Ndërsa për mungesën e mbikalimeve dhe nënkalimeve, ai thotë se problematika i është referuar Autoritetit Rrugor Shqiptar.
Përgjatë autostradës Levan–Tepelenë, lapidarët e ngritur në vendet ku njerëzit kanë humbur jetën janë dëshmi e tragjedive të ndodhura ndër vite.
