Dy fëmijë kanë humbur jetën si pasojë e shpërthimeve të fruthit në Britaninë e Madhe gjatë këtij viti, ndërsa numri i rasteve të konfirmuara ka kaluar 700, kanë njoftuar autoritetet shëndetësore.
Sipas Agjencisë së Sigurisë Shëndetësore të Mbretërisë së Bashkuar (UKHSA), njëri prej fëmijëve vdiq nga fruthi akut, ndërsa vdekja e tjetrit lidhet me pasojat afatgjata të sëmundjes.
Bëhet fjalë për herën e parë që nga viti 2018 kur dy fëmijë humbin jetën nga fruthi brenda të njëjtit vit në Angli dhe Uells.
Fruthi vazhdon të qarkullojë në shumë zona të vendit. Deri më tani janë regjistruar 736 raste të konfirmuara gjatë vitit 2026, krahasuar me 959 raste gjatë gjithë vitit 2025. Shumica e rasteve janë lidhur me shpërthime në Londër dhe West Midlands, ndërsa vetëm në dy javët e fundit janë konfirmuar 106 raste të reja.
Autoritetet shëndetësore kanë shprehur shqetësim për rënien e mbulimit me vaksina, duke theksuar se shumica e rasteve janë regjistruar tek fëmijët e pavaksinuar nën moshën 10-vjeçare.
Më herët gjatë këtij viti, Organizata Botërore e Shëndetësisë (OBSH) njoftoi se Britania e Madhe nuk konsiderohet më një vend që ka eliminuar fruthin. Ky zhvillim erdhi pas stagnimit të normave të vaksinimit dhe rritjes së rasteve të sëmundjes.
Të dhënat më të fundit tregojnë se vetëm 91.8% e fëmijëve pesëvjeçarë në Angli kanë marrë të paktën një dozë të vaksinës MMR (fruth, shytat dhe rubeola) gjatë periudhës 2024-2025. Ky nivel mbetet i pandryshuar nga një vit më parë dhe është më i ulëti që prej viteve 2010-2011.
Fruthi është një sëmundje virale shumë ngjitëse që përhapet lehtësisht tek personat që nuk janë plotësisht të vaksinuar. Edhe pse shumica e pacientëve shërohen, sëmundja mund të shkaktojë komplikacione serioze si pneumonia, inflamacioni i trurit dhe, në raste të rralla, paaftësi afatgjata ose vdekje.
Simptomat përfshijnë temperaturë të lartë, rrjedhje ose bllokim të hundëve, kollë, teshtima dhe skuqje të syve. Pas disa ditësh shfaqet edhe puçrra karakteristike e fruthit, e cila zakonisht fillon në fytyrë ose pas veshëve dhe më pas përhapet në pjesë të tjera të trupit.
Epidemiologia e UKHSA-së, Vanessa Saliba, shprehu ngushëllimet për familjet e prekura dhe paralajmëroi se fruthi mund të ketë pasoja të rënda dhe madje fatale.
“Fruthi vazhdon të qarkullojë në shumë pjesë të vendit dhe, siç kemi parë, mund të jetë një sëmundje shumë serioze. U bëjmë thirrje të gjithë prindërve të sigurohen që fëmijët e tyre të jenë të vaksinuar me MMR ose MMRV, pasi kjo është mbrojtja më e sigurt kundër fruthit”, tha ajo.
Ndërkohë, Sekretari britanik i Shëndetësisë, James Murray, i cilësoi vdekjet si një kujtesë tragjike se fruthi nuk është një sëmundje e padëmshme e fëmijërisë.
“Fruthi mund të shkaktojë komplikacione serioze dhe fatale. Vaksina MMR, e cila ka shpëtuar miliona jetë, mbetet mbrojtja më e mirë që kemi kundër kësaj sëmundjeje shumë ngjitëse”, deklaroi ai.
Autoritetet u bëjnë thirrje prindërve dhe kujdestarëve të kontrollojnë statusin e vaksinimit të fëmijëve të tyre, duke theksuar se nuk është kurrë vonë për të plotësuar dozat e humbura.
“Duke vaksinuar fëmijët tanë, ne jo vetëm i mbrojmë ata, por ndihmojmë edhe në mbrojtjen e personave më të cenueshëm në komunitet”, përfundoi Murray.
