Protestat masive antiqeveritare kanë hyrë në ditën e 26 të tyre, ku qytetarët kërkojnë prej gati një muaji dorëheqjen e kryeministrit Edi Rama.
I ftuar në programin e drekës, përballë Ola Brukos, në News 24 sociologu Eduart Kaca, i cili jeton në Gjermani, deklaroi se diaspora do të vijë sërish më 4 korrik, për një protestë tjetër të madhe.
Ai deklaroi se është zgjedhur 4 korriku pasi është datë simbolike, pasi shënohet pavarësia e SHBA-së.
Në këndvështrimin e tij për protestën Kacaj deklaroi se ka parë edhe grupe heterogjene që ndonjëherë përpiqen t’i japin protestës drejtime të çuditshme. Ai tha se protestat duhet të jenë politike.
“Më 4 korrik do të vijmë sërish, ishte një mendim kolegjial sepse është edhe dita e Amerikës.
E shoh këtë protestë si një shpresë të madhe, si një zgjim të shoqërisë shqiptare.
Në vitin 1990 ndryshimet e mëdha ndodhën nga sipër. Shqipëria dhe Rumania njihen si vende ku ndryshimi ndodhi nga lart poshtë, madje në Rumani ishte telerevolucion.
Herën e fundit pashë grupe heterogjene, persona të intimidueshëm dhe u ndjeva keq. U përpoqën t’i jepnin protestës orientime të çudithsme, çdo protestë është politike.
Thonë mos fol për këtë parti apo atë.
Kudo në botën e qytetëruar protestat drejtohen nga opozita, nëse opozita ka dështuar ka parti të vogla”, tha ai.
