Elseid Hysaj vazhdon të mbetet pa ekip, ndërsa po shqyrton disa oferta për të vazhduar karrierën e tij, tashmë që është lojtar i lirë.
Hysaj është stërvitur për disa ditë me Vllazninë dhe së fundmi është zbuluar se ka marrë një ofertë të çmendur nga një klub i Superiores për të vazhduar karrierën e tij këtu. Raportimet e fundit tregojnë se ka qenë Egnatia ajo që i ka ofruar rreth 500 mijë euro në sezon futbollistit të Kombëtares që të bëhej pjesë e ekipit rrogozhinas.
Një shifër e pabesueshme për kampionatin shqiptar, por të cilën kampionët e Superiores ishin të gatshëm ta shpenzonin për rekordmenin kuqezi. Gjithsesi, Hysaj ka refuzuar, pasi pret të luajë përsëri jashtë Shqipërisë.
Ai nuk është i vetmi lojtar i njohur i Kombëtares që ka marrë oferta të bujshme nga klubet e Superiores ndër vite. Një gjë e tillë i ka ndodhur edhe Lorik Canës, i cili në vitin 2005 mori një ofertë prej 500 mijë dollarësh nga Partizani për t’u bashkuar me të kuqtë. Cana, i cili ishte pranë largimit nga PSG, refuzoi ofertën e ish-presidentit Albert Xhani, pasi po bënte gati transferimin në një klub ku u bë ikonë, Olimpik Marseja.