Hija e Kremlinit po shfaqet mbi martesën e fundit të djalit të madh të Donald Trump. Sipas një hetimi të ProPublica, vetëm tri ditë pasi Donald Trump Jr. u martua në Florida me modelen Bettina Anderson, një pritje luksoze për çiftin në Bahamas u pagua nga Umar Kremlev, një oligark rus i afërt me Vladimir Putinin dhe tashmë mik i Trump Jr.
Të dy u njohën në shtator 2025, gjatë një aktiviteti sportiv në Turqi kundër pjesëmarrjes së atleteve transgjinore, ku Kremlev ishte i pranishëm si drejtues i International Boxing Association (IBA).
Organizata e boksit amator është përfshirë prej vitesh në skandale financiare dhe arbitrimi dhe u pezullua nga Komiteti Olimpik Ndërkombëtar në vitin 2019, përpara se të mos njihej më prej tij në vitin 2023.
Kremlev është i njëjti person që i ofroi boksieres italiane Angela Carini 50 mijë euro pas ndeshjes së saj kundër algjerianes Imane Khelif, një shumë që Carini e refuzoi.
Festa e dasmës u zhvillua në Little Pipe Cay, një ishull privat në Bahamas, ku janë xhiruar edhe filma të njohur si “Casino Royale” dhe “Piratët e Karaibeve”. Ishulli mund të merret me qira për rreth 100 mijë dollarë në ditë.
Sipas ProPublica, Kremlev pagoi jo vetëm qëndrimin, por edhe shërbimin luksoz të ushqimit dhe fishekzjarrët, me një vlerë prej rreth 70 mijë dollarësh.
Në festë morën pjesë familjarë të Trump Jr., përfshirë vëllain dhe partnerin e tij në biznes, Eric Trump, motrën Ivanka Trump dhe bashkëshortin e saj Jared Kushner, si edhe disa bashkëpunëtorë të World Liberty Financial, kompanisë së kriptomonedhave të familjes Trump.
Mes të ftuarve kishte gjithashtu disa shtetas rusë, përfshirë Alexander Lagutin, biznesmen me pozicione të larta në industrinë ruse të mbrojtjes. Ekspertë të kundërzbulimit të konsultuar nga ProPublica e konsiderojnë pagesën e dasmës një situatë problematike, veçanërisht për shkak të historisë së Trump Jr.
Në vitin 2016, ishte pikërisht ai që organizoi në Trump Tower një takim me avokaten ruse Natalia Veselnitskaya, nga e cila shpresonte të merrte informacione komprometuese për Hillary Clinton. Takimi u bë një nga episodet kryesore të hetimeve të Russiagate.
Por kush është në të vërtetë Umar Kremlev? Sipas ProPublica, ai ka lindur me emrin Umar Lutfulloyev dhe deri në moshën 30-vjeçare kishte një të kaluar kriminale, me precedentë për zhvatje dhe sulme.
Më vonë ndryshoi emrin dhe u bë drejtues i një grupi motoçiklistësh nacionalistë dhe proqeveritarë, “Ujqërit e Natës”. Pikërisht aty krijoi lidhje me Alexei Rubezhnoi, i cili sot drejton shërbimet e sigurisë presidenciale ruse.
Kremlev u bë drejtues i Federatës Ruse të Boksit në vitin 2017 dhe, në vitin 2020, mori drejtimin e IBA-s. Organizata u shpëtua nga falimentimi përmes financimit nga gjiganti shtetëror rus Gazprom, duke u shndërruar, sipas kritikëve, në një instrument të fuqisë së butë të Moskës.
Kremlev është lidhur gjithashtu me organizatën “Healthy Homeland”, e cila është përfshirë në sanksione për rolin e dyshuar në një program të transferimit të fëmijëve ukrainas nga territoret e pushtuara nga Rusia.
Tashmë, duke shfrytëzuar retorikën kundër atleteve transgjinore, të afërt me qëndrimet e Trumpit, Kremlev po përpiqet të zgjerojë aktivitetin e tij në SHBA.
Në korrik ai organizoi në Miami një event boksi me duar të zhveshura, i cili u shoqërua me polemika pas arrestimit të influencerit Andrew Tate, i angazhuar për të prezantuar mbrëmjen.
Bettina Trump i ka hedhur poshtë akuzat. “Ndonjëherë një dhuratë dasme është thjesht një dhuratë dasme…”, shkroi ajo në Instagram, duke thënë se miqësia nuk nënkupton automatikisht ndonjë marrëveshje politike.
Por Frank Montoya, ish-oficer i kundërzbulimit të FBI-së, mendon ndryshe. Sipas tij, oligarkë si Kremlev shpesh veprojnë në koordinim me qeverinë ruse.
“Nëse paguaj dasmën tënde, ti do të jesh në borxh ndaj meje”, ka deklaruar ai për ProPublica, duke shtuar se Trump Jr. është vendosur kështu në një pozicion të vështirë dhe të papërshtatshëm për djalin e një presidenti. \\