Në një kohë kur Tirana po përballet me protesta të vazhdueshme të studentëve, të rinjve dhe qytetarëve kundër qeverisë, një fjalim i mbajtur vite më parë nga ish-ministri i Jashtëm, Ditmir Bushati, në Kuvendin e Shqipërisë, rikthehet në vëmendje për aktualitetin e mesazheve të tij.
Në fjalën e tij, Bushati ngrinte shqetësimin për drejtimin që kishte marrë vendi, zhgënjimin e qytetarëve dhe përgjegjësinë e klasës politike për të ardhmen e Shqipërisë. Ai vinte në pikëpyetje përse shqiptarët nuk arrinin të gjenin gjuhën e përbashkët për të ecur përpara, ndërsa vendet fqinje po kapërcenin mosmarrëveshjet historike.
Ish-ministri ndalej veçanërisht te brezat e rinj, duke kritikuar përdorimin e vazhdueshëm të së kaluarës komuniste si justifikim për problemet e vendit. Ai theksonte se pas tri dekadash, politika shqiptare nuk mund të vazhdonte t’ia faturonte të shkuarës dështimet e saj.
“Ne jemi në një udhëkryq të madh. Lexova Financial Times, hapet me foton selfie të kryeministrit të Maqedonisë së Veriut dhe atij të Greqisë. Si ka mundësi, pse kur grekët e maqedonasit e gjejnë gjuhën të ecin para, ne si shqiptarë nuk e gjejmë? Pse nuk gjejmë dot gjuhën të ecim para?”, shprehej Bushati nga foltorja e Kuvendit.
Ai ngrinte gjithashtu shqetësimin për përqendrimin e pasurisë në duart e një numri të vogël njerëzish, largimin e shqiptarëve nga vendi dhe zhgënjimin e atyre që kishin kontribuar ndër vite për Shqipërinë.
“Po 30-vjeçarët, të cilët nuk e dinë se çfarë është komunizmi, do vijojmë t’u themi se është faji i Enverit? 30 vite nuk e justifikojmë dot votën dhe besimin që na kanë dhënë shqiptarët. Është momenti i fundit të shohim nga e ardhmja e të mos bëhemi nostalgjikë të së shkuarës”, deklaronte ai.
Fjalimi i Bushatit merr një domethënie të veçantë në kontekstin e protestave të sotme në Tiranë, ku studentët dhe të rinjtë kanë dalë në rrugë për të kërkuar ndryshime, ndërsa thirrjet për dorëheqjen e kryeministrit Edi Rama janë kthyer në një nga kërkesat kryesore të tubimeve.
Mesazhi i dhënë vite më parë nga ish-ministri socialist, për përgjegjësinë e politikës ndaj brezave të rinj dhe nevojën për të parë drejt së ardhmes, rikthehet kështu në qendër të vëmendjes në një moment tensionesh të forta politike dhe shoqërore në vend.