
Një ngjarje e rëndë është regjistruar mesditën e kësaj të shtune në zonën e Zefyrit, në Atikë të Greqisë, ku dy zjarrfikës, 23 dhe 44 vjeç, kanë humbur jetën gjatë operacionit për shuarjen e një zjarri në një ndërtesë të braktisur.
Sipas informacioneve paraprake, zjarri shpërtheu në një objekt të braktisur në rrugën Katsantoni. Gjatë ndërhyrjes së forcave zjarrfikëse, një pjesë e ndërtesës u shemb papritur, duke zënë poshtë efektivët që ndodheshin brenda dhe po punonin për shuarjen e flakëve.
Pavarësisht përpjekjeve për t’i shpëtuar, dy zjarrfikësit u nxorën pa jetë nga ndërtesa. Ndërkohë, një efektiv i tretë, i cili fillimisht rezultonte i zhdukur dhe po kërkohej nga autoritetet, u gjet i plagosur.
