Kryeministri indian Narendra Modi viziton Emiratet e Bashkuara Arabe, një zhvillim ky që përkon me krizën e radhës së Kashmirit, gati nën ethe lufte, kjo pasi Dehli vendosi t’i heqë të drejtat kushtetuese popullsisë së atyshme, e dominuar nga muslimanët. Madje për këtë, Modi është nën akuza të rënda si nga Pakistani fqinj, e si nga zëra autoritativë muslimanë të Indisë.
Në fillim të këtij muaji, autoritetet indiane shfuqizuan nenin 370 të Kushtetutës Indiane, i cili i jepte status të veçantë rajonit Jammu dhe Kashmir.
E ndërkohë, gjatë vizitës në Emirate, kryeministri indian pritet të marrë dekorimin më të lartë civil, atë “Red Zayed”.
Më pas, Modi do të vizitojë Mbretërinë e Bahreinit, ku do të takohet me autoritetet e larta të këtij shteti të Gjirit.