Lajme të rëndësishme në kërkimin e Alzheimerit. Lecanemab, ilaçi i parë që ngadalëson rrjedhën e sëmundjes, do të marrë dritën jeshile për përdorim në Britaninë e Madhe.
Është cilësuar nga ekspertët si “fillimi i fundit” për këtë formë të demencës degjenerative për të cilën sot ende nuk ka kurë.
ILACI
Lecanemab prodhohet nga kompania farmaceutike japoneze Eisai. Efektiviteti i tij varet nga diagnostikimi i hershëm nëpërmjet testeve dhe vlerësimeve të specializuara.
Në Angli pritet miratimi nga Agjencia Rregullatore e Barnave dhe Produkteve Shëndetësore (MHRA), siç raporton Telegrafi. Në këtë mënyrë do të mundësohet përshkrimi i tij privatisht, më pas Instituti Kombëtar i Shëndetit dhe Ekselencës së Kujdesit do të vendosë nëse do ta zbatojë ose jo në Shërbimin Shëndetësor Kombëtar. Vitin e kaluar u autorizua nga Administrata Amerikane e Ushqimit dhe Barnave.
Efektet anësore, të mundëshme , do të përfshinin ënjtje dhe gjakderdhje në tru, të cilat e tejkalojnë ndikimin në ngadalësimin e sëmundjes. Për këtë arsye, Agjencia Evropiane e Barnave vitin e kaluar refuzoi një licencë për ilaçin, duke preferuar të ndjekë rrugën e maturisë. Që nga autorizimi i MHRA, disa lloje pacientësh të mundshëm do të përjashtohen nga marrja e lecanemab.
Këto përfshijnë ata me gjenin APOE, të cilët kanë një rrezik më të lartë për të vuajtur nga anomalitë imazherike të lidhura me amiloidin (Aria), të karakterizuara nga ënjtje dhe gjakderdhje të trurit. Pacientët që marrin ilaçe antikoagulante gjithashtu nuk do të merren parasysh për shkak të rritjes së rrezikut të gjakderdhjes.
Si funksionon
Ilaçi është trajtimi i parë që mund të modifikojë sëmundjen, të ngadalësojë rënien njohëse dhe të reduktojë pllakat shoqëruese. Duhet të administrohet çdo dy javë përmes një IV. Ai u krijua për të synuar dhe eliminuar amiloidin, një nga proteinat që grumbullohet në trurin e njerëzve me Alzheimer në fazat fillestare të sëmundjes.
Në studimin e Clarity AD, shkencëtarët krahasuan rezultatet e njerëzve që merrnin ilaçin me ato të atyre që merrnin një placebo. Gjatë 18 muajve, ajo që u zbulua ishte befasuese: përparimi i sëmundjes u ul me 27%. Ata që merrnin ilaçin kishin nivele më të ulëta të amiloidit, por përjetuan dhimbje koke dhe ënjtje si efektet anësore më të zakonshme. Profesor John Hardy, një nga studiuesit kryesorë në botë, e quajti atë: “revolucionare, përparimi më i madh në luftën kundër Alzheimerit për dekada”.
