Qendra Spitalore Universitare Nënë Tereza ka reaguar pas denoncimit të deputetes së zgjedhur Ina Zhupa, e cila publikoi pamjet e incidentit që kishte ndodhur sot në repartin e Pediatrisë.
“Një incident ka ndodhur sot paradite në Pediatri. Një pjesë suvaje nga tavani i një dhome u shkëput”, bëhet me dije ndër të tjera në reagimin e QSUT.
Zhupa tha se një fëmijë u dëmtua pasi mbi të ranë copa të suvasë së tavanit.
Por QSUT thotë se nuk ka fëmijë të dëmtuar.
“Dy pacientë të vegjël ndodheshin në dhomë, gjendja e tyre është e mirë, pa dëmtime”, thuhet në njoftimin e QSUT.
“Menjëherë personeli mjekësor ka ekzaminuar dy pacientët e vegjël që ndodheshin në dhomë dhe gjendja e tyre aktualisht paraqitet e mirë, pa dëmtime.
Një grup ekspertësh nga Drejtoria e Shërbimeve Mbështetëse e QSUNT, po kryen një vlerësim teknik për shkaqet e incidentit për marrjen e masave të menjëhershme”, njofton QSUT.
