10 ligje të reformës në drejtësi janë ndryshuar për t’i dhënë mundësi kryesisht gjykatës së lartë dhe SPAK-ut të ecin më shpejt me dosjet e grumbulluar ndër vite.

Kjo nuk është hera e parë që reforma ndryshon, raporton Vizion Plus, por sipas socialistit që e udhëhoqi Fatmir Xhafajt, kjo nuk tregon se reforma në drejtësi ka dështuar.

 

FATMIR XHAFAJ

DEPUTET, PS

“Natyrisht një reformë kaq komplekse ka dhe do të ketë përherë problemet e veta në zbatim. Është naivitet të mendosh ndryshe pasi ka probleme që rrjedhin kryesisht nga kompleksiteti i vet reformës dhe institucioneve të saj, nga ecja me shpejtësi të ndryshme brenda saj për shkak edhe të vonesave të krijuara nga kundërshtarët e saj e kryesisht nga PD, nga pengesat ligjore e institucionale të krijuara artificialisht në hallka të ndryshme të zbatimit të procesit, etj. “

 

Por 6 vjet pasi 140 deputetë ndryshuan kushtetutën për reformën në drejtësi, klasa politike ka një apel për institucionet e reja.

 

 

 “Ndaj ka ardhur momenti që institucionet e reja të drejtësisë të dëshmojnë përgjegjshmërinë e tyre, fuqinë e tyre dhe qëllimin për të cilën janë krijuar. Ne kemi luftuar dhe kemi marrë një kosto jo pak të vogël, qytetarët dhe partnerët kanë investuar fort te ky projekt prandaj e vetmja përgjigje që pranohet nga radhët e gjyqtarëve, prokurorëve dhe anëtarëve të institucioneve të reja është: Rezultate!”

 

Nga ana tjetër Xhafaj i ka bërë apel klasës politike të mbështesë reformën në drejtësi.

 

 “Kjo kërkon jo thjesht e vetëm të mbështesim kërkesat realiste për zbatimin e reformës dhe koordinimin sa më mirë të këtij procesi, por edhe distancimin e qartë dhe publik ndaj çdo tentative sado e vogël qoftë ajo ndaj përpjekjeve për interferenca në vendimmarrjet e institucioneve të reja, në përzgjedhjen klienteliste të anëtarëve të tyre dhe kryesorja për ndikimin në to për kontroll e influencë nga çdo krah që ato të vijnë.”

 

Ligjet e reformës në drejtësi kërkojnë 84 vota për t’u ndryshuar; fillimisht mazhoranca synoi t’i ndryshonte ato së bashku me PD, por konsensusi nuk u arrit asnjëherë.

 

Por pas djegies së mandateve nga PD e LSI, PS ka arritur lehtësisht kuorumin prej 3/5 duke ndërhyrë disa herë në ligjet e reformës.