90 deputetë votuan pro zgjatjes së koncesionit për aeroportin e Rinasit deri në vitin 2040.
Marrëveshja me pronarët shqiptarë është mbrojtur nga ministrja e infrastrukturës Belinda Balluku, e cila ka renditur si argument pro zgjatjes së koncesionit së pari vlerën e investimit që do të shkojë në 99 milionë euro dhe dyti uljen e çmimit të biletës.
BELINDA BALLUKU
MINISTRE E INFRASTRUKTURES
“Tarifa e aeroportit për të gjithë pasagjerët adultë ulet me 20-25%, ndërkohë që tarifa për të gjithë pasagjerët fëmijë do të ulet me 40%.”
Por kjo masë nuk është e vetme për uljen e çmimit të biletës, pasi qeveria i ka kërkuar koncesionarit liberalizimin e furnizimit me karburant të avionëve sepse çmimi aktualisht është më i larti në rajon.
“Nëse në rajon lëviz nga 730 në 760 zakonisht sipas lëvizjeve të bursës, në aeroportin e Rinasit çmimi i blerjes së karburantit arrin deri në 1060 euro për metër/ton. Pra kuptoni një diferencë të jashtëzakonshme e cila ka qenë e reflektuar në biletë.”
Si argument i shtuar për zgjatjen me 13 vjet të koncesionit mbi aeroportin ndërkombëtar të Rinasit, ministrja Balluku ka sjellë në vëmendje edhe efektet e pandemisë mbi fluturimet.
“Në rast se kjo verë do të digjet për të gjithë Europen do të arrihet ajo shifër e pasagjerëve dhe e trafikut ajror që kishim në vitin 2019, vetëm pas vitit 2029.”
Historia e dhënies me koncesion të aeroportit të vetëm ndërkombëtar në Shqipëri nisi me qeverinë Nano në vitin 2005. Në 2016 u arrit marrëveshje për heqjen e ekskluzivitetit të fluturimeve, duke shtyre zgjatjen e tij deri në 2027, dhe pas vendimit te parlamentit afati zgjatet për herë të dytë me 13 vite.
