8 korrik 13 vite më parë, në 8 korrik 2008, qyteti i Beratit u përfshi në listën e thesareve të rralla botërore të UNESCO-s.
Kryeministri Edi Rama kujtoi sot këtë datë, ndërsa ndau një fotografi nga qyteti i “Një mbi një dritareve”.
Në 8 korrik të vitit 2008, Berati u regjistrua në Listën e UNESCO-s nga Komiteti i Trashëgimisë Botërore në Konferencën e radhës të mbajtur në Kanada.
Berati u vlerësua si një shembull i rrallë i arkitekturës tipike osmane. Sipas UNESCO-s, Berati është dëshmitar i bashkëjetesës së komuniteteve të ndryshme fetare dhe kulturore përgjatë shekujve.
Në kriterin 3 të arsyes së futjes së Beratit në UNESCO thuhet shprehimisht se Berati dhe Gjirokastra janë një dëshmi e shquar e diversitetit të shoqërive urbane në Ballkan, dhe të jetgjatësisë së mënyrave të jetës, të cilat sot pothuajse janë zhdukur.
Kriteri 4 thotë se dy qytetet, e Beratit dhe Gjirokastrës, janë dëshmi e jashtëzakonshme për llojet e ndryshme të monumenteve dhe banesave popullore urbane gjatë periudhës Klasike Osmane, në vazhdimësi me kulturat Mesjetare që e paraprinë atë.
Ky është një vlerësim mjaft i rëndësishëm për qytetin e Beratit, i cili renditet kështu midis 600 vendeve të botës që janë në UNESCO si rrjedhojë e Trashëgimisë së tyre Universale.
“Qyteti i një mbi një dritareve” mendohet që të jetë themeluar që në epokën e bronzit, por që formën e tij të mirëfilltë e mori si qytet-kështjellë, i quajtur Antipatrea, në vitet 313-310 para lindjes së Krishtit. Pikërisht ky ka qenë edhe emri i tij i parë zyrtar me të cilin njihet edhe nëpërmjet dokumenteve.
Ai gjithashtu për nga rëndësia e tij që kishte, gjatë pushtimit romak në shekullin II para Krishtit, u emërtua edhe si “Fortesa e Arbërve”.
Në vitin 1961, Berati u shpall zyrtarisht qytet-muze, me pasuri të konsiderueshme monumentesh dhe me vlera të larmishme, të cilat përbëjnë një dëshmi të trashëgimisë kulturore, historike e artistike, të jetës e të punës, të realizuara mjeshtërisht brez pas brezi nga banorët e tij./m.m/
