Presidenti Ilir Meta iu është bashkuar homazheve sot në Vlorë në kuadër të 108-vjetorit të Pavarësisë së Shqipërisë, ndërsa ka vendosur kurorë me lule në varrin e Ismail Qemalit.

Në një prononcim për mediat, kreu i shtetit theksoi se ky 28 Nëntor është i veçantë, pasi është kohë pandemie. Sipas Metës, pavarësia dhe sovraniteti duhen ruajtur si sytë e ballit.

“Është kënaqësi e veçantë që të jem në Vlorë. Është një nëntor i veçantë, dhe për shkak të kësaj fatkeqësie të pandemisë.

Jemi të detyruar që të jemi të kujdesshëm nga festimi dhe kremtimi i ditës më të madhe të popullit tonë. Jemi besimplotë se 28 nëntori i ardhshëm do të jetë ndryshe dhe do ta festojmë në kushte të tjera.

Është një 28 nëntor i veçantë dhe për një arsye tjetër, pasi 3 muaj më parë ne festuam 100-vjetorin e Çlirimit të Vlorës.

Pavarësia dhe sovraniteti duhen ruajtur si sytë e ballit. Kjo është një ditë që duhet respektuar dhe për t’u bashkuar në të ardhmen. Sot nderojmë ata që dhanë jetën për pavarësinë e Shqipërisë,” tha Meta.

Subscribe kanalin tonë në Youtube për të mos humbur asnjë video të re