Kur kanë mbetur edhe pak ditë nga sfida vendimtare drejt Botërorit 2026, te kombëtarja e Polonisë ndezin përballjen me Shqipërinë. “Bardhekuqtë” e kanë vlerësuar maksimalisht kombëtaren kuqezi dhe, përpara një sfide të rëndësishme, përveç ambicies sportive, në lojë është edhe një shpërblim i konsiderueshëm financiar për futbollistët.
Më 26 mars, Polonia do të presë Shqipërinë në gjysmëfinalen e play-off-it në Varshavë. Nëse arrin të mposhtë kuqezinjtë, skuadra e drejtuar nga trajneri Urban do të përballet gjashtë ditë më vonë me fituesin e ndeshjes Ukrainë–Suedi. Fitorja në këtë duel final do t’i siguronte Polonisë biletën për në Kupën e Botës që do të zhvillohet në Shtetet e Bashkuara.
Lojtarët polakë mund të motivohen edhe nga një bonus i madh financiar në rast kualifikimi.
Nëse Polonia siguron pjesëmarrjen në Botëror, futbollistët do të marrin rreth 40% të shumës prej 10.5 milionë dollarësh që FIFA garanton për skuadrat pjesëmarrëse në fazën e grupeve.
Kjo do të thotë se lojtarët e kombëtares polake mund të ndajnë mes tyre rreth 4.2 milionë dollarë. Megjithatë, në Poloni shpresohet që këtë herë të shmangen polemikat si në Kupën e Botës në Katar, kur pati mosmarrëveshje për ndarjen e bonusit përpara se ai të sigurohej në fushë. Skuadra që do të kualifikohet nga ky raund play-off do të vendoset në Grupin F të Kupës së Botës, ku do të përballet me Holandën, Japoninë dhe Tunizinë.
