Prej 20 vitesh punonte në Itali (Campania). Me origjinë vinte nga Maroku. Rahal Amari ishte 42 vjeçar dhe arriti të kryejë një akt të madh heroik, para se zemra e tij të pushonte së rrahuri.
Media italiane ka bërë me dije se 42 vjeçari ka arritur t’i shpëtojë jetën dy prej 4 fëmijëve që rrezikonin të mbyteshin në det, në zonën e Castel Volturno-s (Caserta). Siç shkruan Corriere della Sera, 42 vjeçari ishte i pari i cili dëgjoi thirrjet për ndihmë të fëmijëve në det e po ashtu i pari që hyri në ujë për t’i shpëtuar. Roja bregdetare ndërkohë vrapoi të vinte në det gomonen e shpëtimit.
Dy prej 4 fëmijëve të vegjël, në pamundësi për të dalë në breg prej rrymave të forta të detit, u shpëtuan nga 42 vjeçari. Amari arriti të marrë një prej fëmijëve dhe e nxorri i vetëm në bregun e detit. Një peshkatar që ndodhej atje pranë me varkë kuptoi ngjarjen e shkoi të ndihmojë fëmijën e dytë, i cili ndodhej ende në ujë e po tërhiqej nga rrymat. Ndërkohë 42 vjeçari u hodh sërish në det e nisi t’i drejtohet fëmijës, por aty ndodhi tragjedia. Amari nisi të zhytej në ujë. Peshkatari nxorri në breg fëmijën e dytë, ndërsa roja bregdetare 42 vjeçarin.
Dy fëmijët e tjerë (sipas Corriere ishin 4 fëmijë në ujë) arritën të dalin vetë nga deti.
Ambulanca mbërriti në vendin e ngjarjes dhe tentoi të rianimojë 42 vjeçarin, por ishte shumë vonë. Nga ajo që shkruan media italiane, burri nga Maroku ndërroi jetë për shkak të një goditje në zemër.
