Kryetari i Bashkisë së Tiranës, Erion Veliaj iu pergjigj dy deputetëve të PD-së, Alfred Rrushaj dhe Agron Gjekmarkaj.

Veliaj i akuzon dy depuytetet se po organizojnë protestat me një grup banorësh në zonën e “5 Majit”,  duke shtuar se përmes politikës së bllokimit të projekteve, Rrushaj dhe Gjekmarkaj do të gjejnë fundin e karrierës politike.

 

Duke sjellë shembujt e mëparshëm si tek “Bregu i Lumit” apo “Bulevardi i Ri”, Veliaj u kujtoi dy deputetëve demokratë se nëse do vazhdojnë të përdorin për politikë projektet e bashkisë, do të përfundojnë në koshin e historise, siç përfunduan paraardhësit e tyre deputetë, që krijonin konflikte të paqëna.

 

“Përgjigja ime për të gjithë ata politikanë që shkojnë dhe nxisin numëruesit e tyre, komisionerët e tyre, tarafin e tyre, për të organizuar protesta, dua t’ju kujtoj një gjë: Ai “Bregu i Lumit” i ka ngrënë disa karriera politikanësh, që sot nuk e ekzistojnë më, njerëzit ua kanë harruar emrat. Ai “Astiri” i hëngri disa koka politikanësh që sot nuk janë më as në Parlament, askund! Ai “Bulevardi i Ri” i hëngri disa koka politikanësh, ai “Liqeni” i hëngri disa koka politikanësh, ai këndi i lodrave, ajo “Kalaja” apo Pazari i Ri, i hëngri disa koka politikanësh. Kështu që, për ata që janë rishtarë si deputetë të opozitës dhe që e kanë marrë me zell përdorimin e taktikave të vjetra për të bllokuar punët e qytetit, kam vetëm një paralajmërim: “Mos paçi fatin e atyre që e lanë karrierën te “Bregu i Lumit”. Nëse do vazhdojmë të përdorim për politikë projektet e bashkisë, nuk do t’ju lë asgjë mangët që të përfundojnë në koshin e histories, siç përfunduan të tjerët që, për të penguar bashkinë, cystin njerëzit, cystin konflikt social, cystin protesta dhe cystin një histori histerie të paqenë”, tha Veliaj.

 

Kryebashkiaku i bëri akuzat nga Krraba, ku i dorëzoi çelësat e banesës së re një prej familjeve të prekura nga tërmeti i 26 nëntorit 2019.

Subscribe kanalin tonë në Youtube për të mos humbur asnjë video të re