Stafi i Spitalit “Shefqet Ndroqi” ka reaguar pas ngjarjes së rëndë të ndodhur mbrëmë pas mesnate, ku u hodh nga lartësia duke gjetur për pasojë jetën 60-vjeçarit Leonard Skabona.

Ndërsa i shpreh ngushëllimet familjes, stafi i spitalit deklaron se i ndjeri ishte shtruar pasditen e 28 nëntorit në spital dhe një ditë më vonë është transferuar në katin e parë (mbi atë përdhes), ku edhe kreu aktin e rëndë.

Stafi i Spitalit thotë se një hetim ka nisur mbi arsyet e vdekjes, ndërsa siguron se ka siguruar shërbimin e psikologut dhe ka shtuar masat e sigurisë.

Reagimi i spitalit:

Stafi i spitalit universitar “Shefqet Ndroqi” shpreh dhimbjen për humbjen e jetës së 60-vjeçarit me inicialet L.S., nga Kurbini i cili i dha fund jetës mbrëmë pas mesnate, dhe i shpreh ngushëllimet më të sinqerta familjes së tij.

60-vjeçari i konfirmuar me COVID-19, ishte shtruar pasditen e datës 28 nëntor në spitalin “Shefqet Ndroqi”, ku iu kryen ekzaminimet imazherike dhe u trajtua me terapinë e plotë të mjekimit në pavionin e urgjencës.

Më datë 29 pacienti është transferuar në pavionin e katit të parë (mbi katin përdhes) ku edhe ka kryer aktin e rëndë.

Lidhur me arsyet që e çuan 60-vjeçarin drejt këtij akti ekstrem, është duke u kryer hetimi nga ana e organeve kompetente.

Stafi i spitalit universitar “Shefqet Ndroqi” ka siguruar shërbimin e psikologut dhe ka shtuar masat e sigurisë.

Stafi mjekësor është në gatishmëri të plotë dhe i sigurojmë qytetarët se po punojmë dhe do të vazhdojmë të punojmë me përkushtim dhe profesionalizëm për çdo pacient që trajtohen në spitalin tonë.

Subscribe kanalin tonë në Youtube për të mos humbur asnjë video të re