Ministrja e Shëndetësisë, Ogerta Manastirliu, ka deklaruar se pavarësisht rritjes së shifrave nga data 1 qershor do të vazhdojë plani i hapjes ashtu si ishte vendosur.
Ajo deklaroi se nga 1 qershori do të lejohet lëvizja në të gjithë territorin e vendit, hapen plazhet. çerdhet, kopshtet dhe kufijtë tokësorë.
“Nuk duhet harruar se rihapja kërkon vigjilencë individuale. Do vazhdojmë me planin tonë të rihapjes me lirinë e lëvizjes. Do të kërkohet sakrifica individuale.
Është vendosur që ne të ndjekim planin e vendosur më herët pavarësisht rritjes së shifrave.
Nga 1 qershori lejohet lëvizja në të gjithë territorin pa asnjë kufizim. Do të hapen çerdhet dhe kopshtet dhe kufijtë tokësore. Mbetet në fuqi karantina 14 ditë.
Nga data 1 qershor plazhet do të jenë të hapura me autorizime nga një autoritet i përkohshëm që është ngritur në këtë periudhë. Të gjithë të zbatojnë protokollet që do të bëhen publike.
Do të lejohen kampionatet sportive pa praninë e publikut. Do të hapen parqet. Po punohet për një plan për transportin publik por deri në miratimin e tij do qëndrojnë të mbyllura.
Do të qëndrojnë të mbyllura aktivitetet kulturore, kinematë, teatrot, palestrat dhe klubet”, tha Manastirliu.