“Kishim bllokim frymëmarrje”, flet për Fax News një prej punonjëseve të helmuara në Durrës: Ka ardhur si pasojë e barit për dezinfektim

Një prej punonjëseve të helmuara në kompaninë “Forschner Albania”, në Durrës, ka dhënë një deklaratë jashtë kamerave për Fax News. Ajo ka dashur të mbetet anonime, ndërsa sa i përket helmimit, u shpreh se mendonte se mund të ketë ardhur si pasojë e barit të përdorur për dezinfektim të ambienteve të brendshme të kompanisë.

Ndër të tjera, ajo shtoi se një pjesë e madhe e punonjëseve kishin shkuar në shtëpi për t’u qetësuar.

“Shkuam në mëngjes në punë dhe na ndanë punët. Pas 10 minutash nisën shenjat e para të helmimit. Kishim marrje mendësh dhe bllokim frymëmarrje. Nxorrën jashtë punonjësit derisa erdhi mjeku. Nuk na lajmëruan se kishin bërë dezinfektim ditën e djeshme. Një pjesë e madhe e punonjësve kanë shkuar në shtëpi. Mendoj se helmimi ka ardhur si pasojë e barit që përdorin për disifektim të ambienteve të brendshme”– tha ndër të tjera një prej grave të helmuara në Durrës.

Njoftimi i Plotë:

Durrës/Informacion paraprak

Mesditën e sotme janë paraqitur në spitalin e Durrësit, shtetaset O. A., 41 vjeçe, A. R., 26 vjeçe, M. Xh., 30 vjeçe, A. Gj., 35 vjeçe dhe J. K., 38 vjeçe, të cilat dyshohet se janë helmuar në ambientet e punës, në një firmë në autostradën Durrës-Tiranë. Aktualisht ndodhen nën kujdesin e mjekëve, jashtë rrezikut për jetën.

Grupi hetimor ndodhet në vendngjarje dhe po punon për sqarimin e rrethanave të ngjarjes.