Fituesi i tripletës me Interin në 2010-ën, Maikon përmes rubrikave të “La Gazzetta dello Sport” bekoi zgjedhjen e klubit zikaltër për t’ia besuar rolin e trajnerit, Kristian Kivu.“A është ai njeriu i duhur? Zikaltërit kanë absolutisht të drejtë. Jam i anshëm për shkak të gjithçkaje që kemi përjetuar së bashku dhe mund t’i uroj vetëm më të mirën, por me të vërtetë mendoj se Kivu ka cilësitë njerëzore dhe profesionale për të filluar një rrugë të re fituese. Sigurisht, ai ka një punë shumë të vështirë përpara, nuk është e lehtë sepse dhimbja pas finales së Ligës së Kampioneve është e madhe. Di diçka për këtë sepse shkova nga 7-1 me Gjermaninë në një Kupë Bote në shtëpi… Por nëse ka një person që di si të ngrihet në kohë të vështira, ai është Kristian Kivu.”
Një virtyt dhe një e metë? E meta… pyeteni gruan e tij. Virtyti është se ai është besnik, diçka që çdo lojtar do ta donte nga trajneri i tij. Ai i thotë gjërat ashtu siç janë, pa u shqetësuar shumë, madje pa u zemëruar nëse është e nevojshme: në një dhomë zhveshjeje duhet të shkosh drejtpërdrejt në thelbin e problemeve.
Lidhur me polemikat që lidhen me përvojën shumë të pakët të rumunit (13 stola në Serie A), ish-mbrojtësi brazilian tha: “Ai bëri një punë shumë mirë te Parma, por a mendoni vërtet se Kivusë i mungon përvoja? Me dhomat e zhveshjes që frekuentoi, betejat që fitoi dhe humbi, trajnerët e shkëlqyer që takoi? Nga Murinjo, për shembull, ai mësoi se si të menaxhojë një grup të nivelit të lartë, diçka që është veçanërisht e nevojshme në këtë kohë kur komponenti psikologjik është shumë i rëndësishëm pas goditjes së marrë. Për mua, përvoja në nivele të caktuara nuk ekziston, ka një rrugë për të ndjekur së bashku me lojtarët, ditë pas dite”.
