Për shumë njerëz, kafshët shtëpiake janë pjesë e familjes. Por a është “e strukura” me një kafshë gjatë natës gjëja më e mirë për shëndetin tuaj?
Hulumtimet kanë treguar se ndarja e shtratit me një kafshë shtëpiake është një praktikë mjaft e përhapur. Në një studim të vitit 2015, 56% e pjesëmarrësve që kanë kafshë shtëpiake thanë se flinin në të njëjtin krevat me kafshën e tyre, dhe në një anketë të vitit 2022, 46% e të anketuarve thanë të njëjtën gjë.
Ekspertët thonë se ka një sërë rreziqesh dhe përfitimesh.
“Megjithatë, nuk ka asnjë rregull apo përgjigje të vetme për të gjithë, nëse duhet ta lejoni kafshën tuaj të flejë në shtrat me ju”, tha për Health në Jamie Whittenburg, veterinere.
Praktika mund të vijë me disa rreziqe shëndetësore, siç është transmetimi i parazitëve, tha Whittenburg. Nga ana tjetër, mund të ketë përfitime të lidhjes dhe shëndetit mendor si për kafshën shtëpiake, ashtu edhe për pronarin.
Vendimi në thelb varet nga preferenca personale, sjellja e kafshës shtëpiake dhe çdo konsideratë shëndetësore, shpjegoi ajo.
Ja çfarë duhet të dini për rreziqet e mundshme të gjumit të përbashkët me një kafshë shtëpiake, sipas alergologëve dhe veterinerëve.
Fjetja e përbashkët me një kafshë shtëpiake mund të përbëjë rreziqe për shëndetin. Pavarësisht se sa shumë i duam kafshët tona, ndarja e një shtrati me ta nuk është gjithmonë zgjidhja më e shëndetshme, tha në një deklaratë për Health, Purvi Parikh, MD, asistent profesor klinik dhe ekspert i alergjive dhe sëmundjeve infektive.
Kjo është veçanërisht e vërtetë për njerëzit me kushte ose shqetësime të caktuara para-ekzistuese shëndetësore.
Në SHBA, miliona njerëz jetojnë me kafshë shtëpiake, pavarësisht se kanë alergji. Nëse dikush me alergji fle me kafshë shtëpiake mund të ketë reaksion alergjik si kruarja e syve, teshtitja ose urtikaria.
“Kjo do t’i përkeqësojë ndjeshëm simptomat dhe astmën për shkak të ekspozimit të vazhdueshëm [ndaj qimeve dhe zbokthit të kafshëve shtëpiake],” tha Parikh.
Edhe nëse dikush nuk është alergjik ndaj zbokthit të kafshëve shtëpiake, gjumi me një kafshë shtëpiake mund të shkaktojë ende këto probleme.
Ekspozimi ndaj parazitëve dhe sëmundjeve zoonotike
Fjetja në të njëjtin shtrat mund t’ju ekspozojë ndaj parazitëve – këta mund të jenë të jashtëm, si pleshtat dhe të brendshëm, si krimbat.
Kafshët shtëpiake gjithashtu mund të bartin disa sëmundje zoonotike, të tilla si leptospiroza, salmoneloza dhe bartoneloza, të cilat mund t’i marrin nga kafshë të tjera të infektuara ose mjedise të kontaminuara.
Një kafshë e infektuar mund të bartë baktere në gojën dhe në qimet e tyre, që mund të jenë potencialisht rrezik për disa individë, veçanërisht ata që janë të imunokompromentuar.
Rreziku i kontaktit me bakteret e padëshiruara është më i theksuar me kafshët shtëpiake që enden jashtë.
“Në përgjithësi, kafshët shtëpiake që trajtohen siç duhet nga veterinerët dhe kanë marrë të gjithë kujdesin e duhur mjekësor duhet të kenë një probabilitet shumë të ulët të bartësit të parazitëve që mund të transmetohen te njerëzit,” tha Laidlaw për Health. “Por nuk është zero.”
Gjumi jo cilësor gjatë natës
Natën, kafshët shtëpiake mund të lëvizin, lëpijnë, gërvishtin ose zënë shumë hapësirë në shtrat, duke shkaktuar potencialisht ndërprerje të gjumit. Në fakt, hulumtimet kanë treguar se fletja me kafshë lidhet me cilësi më të keqe të gjumit.
Një studim i vitit 2023 zbuloi se një e treta e pronarëve të kafshëve shtëpiake “shpesh” ose “gjithmonë” përjetojnë ndërprerje të gjumit për shkak të kafshëve të tyre.
Ndarja e shtratit me një kafshë shtëpiake mund të jetë edhe e dobishme
Megjithëse gjumi me kafshë shtëpiake ka disa anë negative, ka edhe disa përfitime, duke përfshirë shëndet më të mirë mendor, vetëvlerësim dhe më pak depresion e ankth.
Shumë mbajtës të kafshëve shtëpiake gjejnë ngushëllim te kafshët e tyre. Të kesh kafshë shtëpiake në shtrat mund të reduktojë ankthin dhe t’u japë një ndjenjë mbrojtjeje dhe rehatie.
Për shkak se të pasurit e një kafshe në shtrat mund të rrisë këtë ndjenjë sigurie ose rehatie, disa studime sugjerojnë se kafshët shtëpiake mund të kenë efekt pozitiv në cilësinë e gjumit./Gazeta Shëndeti
