Lulzim Basha është i bindur se Partia Demokratike nuk po shkon drejt ndarjes dhe se 18 Dhjetori është dita e bashkimit të demokratëve. Në një intervistë, kryedemokrati akuzon Berishën se po përdor demokratët për hallet e tij personale.
“Nuk ka palë në PD, ka një PD, ka një Kuvend më 18 Dhjetor, sipas vendimit të Kryesisë së PD. Ka një individ, i cili po përpiqet ta përdorë PD si mburojë ndaj halleve dhe problemeve personale që ka pas shpalljes së tij non grata nga SHBA. Për këtë arsye, Kuvendi i 18 Dhjetorit, do të jetë një Kuvend bashkimi i të gjithë demokratëve”.
Nuk i druhet aspak një vendimi për shkarkimin e tij, teksa e cilëson antistatutor thirrjen nga Berisha në 11 Dhjetor të Kuvendit Kombëtar të demokratëve.
“Askush, as Sali Berisha nuk i mbivendoset dot asnjë anëtari tjetër dhe nuk i mbivendoset dot rregullave që na mbajnë bashkë në këtë shtëpi të lirisë, që është statuti dhe vlerat e kësaj partie”.
Por a është i mundshëm një bashkim mes Berishës e Bashës?
“Për fat të keq Sali Berisha ka hedhur në erë çdo urë të mundshme të afrimit me demokratët”.