Nëse ju pëlqen ta filloni ditën me një filxhan kafe, nuk jeni vetëm! Kafeja është një nga pijet më të njohura. Dhe përveç rritjes së energjisë që mund të sigurojë, pirja e kafesë mund të ofrojë një numër befasues përfitimesh shëndetësore.
Por a mund t’ju ndihmojë kafeja të humbni peshë, siç sugjerojnë disa burime?
Kafeja është e njohur për antioksidantët e saj, përfitimet njohëse dhe për rritjen e jetëgjatësisë. Por hulumtimet tregojnë se kafeja dhe kafeina mund të jenë gjithashtu të dobishme për humbjen e peshës. Disa ekspertë besojnë se kafeja mund të rrisë metabolizmin, të reduktojë urinë dhe të rrisë nivelet e energjisë.
Pra, sa ndikim mund të ketë vërtet kafeja në humbjen e peshës? Dhe sa kafe duhet të pini në baza ditore?
Lexoni më tej për të mësuar më shumë se si kafeja mund të ndikojë në peshën tuaj dhe çfarë përfitimesh të mundshme për humbjen e peshës mund të sjellë kjo pije e shijshme.
Marrëdhënia midis kafesë dhe peshës
Kafeina mund të na ndihmojë të ndihemi më vigjilentë, veçanërisht gjatë pasdites . Ky stimulues natyral rrjedh nga bimët dhe siç e dini, zakonisht gjendet në pije të tilla si kafeja dhe çaji.
Por çfarë ka kafeja dhe kafeina që mund të lidhen me humbjen e peshës? Studiuesit kanë zbuluar se kafeina mund të stimulojë termogjenezën, e cila ndihmon në djegien e kalorive më shpejt.
Një meta-analizë e kohëve të fundit konfirmoi këto gjetje, duke zbuluar se ekziston një korrelacion midis marrjes së kafeinës dhe uljes së yndyrës trupore, BMI-së dhe peshës trupore. Disa studime kanë sugjeruar gjithashtu se kafeina ndikojë edhe në humbjen e oreksit, megjithëse nevojiten akoma më shumë kërkime për ta konfirmuar këtë.
Megjithatë, studime të tjera tregojnë rezultate jokonsistente mbi efektin e kafesë në menaxhimin e peshës. Për disa njerëz, kafeina mund të ketë efekte të dëmshme në hormonet e stresit dhe nivelet e përgjithshme të stresit.
Të pasurit një dietë të ekuilibruar, të stërvitesh rregullisht, të kesh hormone të balancuara, të flesh mjaftueshëm dhe të ulësh stresin janë gjithashtu komponentë të rëndësishëm të menaxhimit të peshës.
A mund të reduktojë kafeja dhjamin në bark?
Në disa studime ekspertët janë përpjekur të hetojnë përfitimet e mundshme të kafesë dhe kafeinës në reduktimin e yndyrës. Pra, a mund të ketë vërtet kafe që redukton yndyrën rreth barkut? Ndoshta, por nevojiten më shumë kërkime për lidhjen.
Sipas një meta-analize në 12 studime epidemiologjike, marrja e kafesë mund të lidhet në mënyrë modeste me zvogëlimin e dhjamosjes, veçanërisht te meshkujt. Ndërsa ndryshimet në peshë, BMI dhe yndyrë trupore të vëzhguara në studime të ndryshme ishin statistikisht të rëndësishme, reduktimet ishin shumë të vogla për të ndikuar në përbërjen e përgjithshme të trupit.
Megjithatë, deri më tani, marrja e kafeinës nuk duket të ketë një efekt klinik domethënës në peshën trupore.
Po në lidhje me ata që thonë se kafeina mund të rrisë normën metabolike? Epo, disa studime tregojnë se kafeina mund të rrisë pak normën metabolike te njerëzit më të dobët.
Megjithatë, ky efekt mund të jetë më pak i rëndësishëm tek ata që janë obezë. Kjo mund të ndodhë sepse ndërsa trupi përshtatet me nivelin e ri të marrjes së kafeinës me kalimin e kohës, ai gjithashtu redukton çdo efekt të mundshëm metabolik.
Siç mund ta shihni me siguri deri tani, gjetjet nga studimet që kanë ekzaminuar lidhjen midis konsumit të kafesë dhe rezultateve të humbjes së peshës janë ende të kufizuara në këtë kohë.
A mund të shkaktojë kafeja shtim në peshë?
Pra, nëse kafeja mund të mos ndikojë në uljen e yndyrës së barkut, a ka ndonjë shans që të ketë efektin e kundërt? Ja çfarë duhet të dini.
Së pari, siç e përmendëm më herët, do të dëshironi të shikoni ato aditivë të kafesë nëse qëllimi juaj është të humbni peshë. Përpiquni të minimizoni sheqerin e shtuar dhe ëmbëlsuesit, kremin dhe “shtesa” të tjera që shtojnë kalori, sheqer dhe yndyrë në filxhanin tuaj.
Kafeina e gjetur në kafe mund të çojë në gjumë të dobët, rritje të kortizolit dhe dëshira të shtuara për sheqer tek individë të caktuar. Këta janë vetëm disa faktorë që mund të ndikojnë negativisht në peshë.
Le të hedhim një vështrim në disa nga mënyrat e tjera se si kafeina mund të ndikojë në menaxhimin e peshës.
Nivelet e stresit
Disa studime tregojnë se kafeina mund të rrisë nivelet e kortizolit tek disa njerëz. Meqenëse studiuesit kanë gjetur gjithashtu një lidhje midis niveleve të larta të kortizolit dhe shtimit të peshës abdominale, mund të dëshironi të kufizoni sasinë e kafeinës që konsumoni nëse tashmë jeni të prirur ndaj stresit.
Gjumi
A keni vështirësi për të fjetur mirë? Nëse po, merrni parasysh se si kafeina mund të ndikojë në gjumin tuaj.
Kafeina mund të qëndrojë në trup deri në tetë orë dhe mund të prishë gjumin, duke reduktuar cilësinë e tij. Gjumi i mjaftueshëm është çelësi për rregullimin e hormoneve dhe rritjen e shkallës tuaj metabolike.
Gjumi i dobët mund të rrisë rrezikun për shtim në peshë për shkak të niveleve më të larta të kortizolit. Mungesa e gjumit mund të nxisë gjithashtu dëshirat për ushqime dhe pije me sheqer, të cilat mund të ndikojnë në ekuilibrin tuaj të glukozës dhe objektivat e humbjes së peshës.
Metabolizmi
Ndërsa disa studime tregojnë se kafeina nuk ka ndikim në ndjeshmërinë ndaj insulinës, të tjera tregojnë se mund të ulë ndjeshmërinë ndaj insulinës. Kjo do të thotë që nivelet tuaja të glukozës mund të ndikohen në varësi të dozës dhe shpeshtësisë së konsumit tuaj të kafeinës.
Disa kushte mjekësore mund të ndikojnë në mënyrën se si sillet kafeina në trupin tuaj dhe si ndikon në shëndetin tuaj metabolik.
Shëndeti i zorrëve
Kafeina gjithashtu mund të përkeqësojnë simptomat e tretjes për disa njerëz që përjetojnë simptoma të sindromës së zorrës së irrituar (IBS). Një studim sugjeroi se shtimi në peshë i shkaktuar nga IBS mund të ndikohet nga hormonet që qëndrojnë në zorrë.
Sa kafeinë mund të konsumojmë në ditë?
Ekspertët sugjerojnë se, të rriturit duhet të synojnë të konsumojnë më pak se 400 miligramë kafeinë në ditë, ose më pak se 4-5 filxhanë kafeje. Një porcion kafeje të zakonshme mund të ketë një përmbajtje kafeine prej rreth 100 miligramësh.
Kafeja nuk është e vetmja pije që përmban kafeinë; çaji i zi, çaji jeshil dhe soda me kafeinë duhet gjithashtu të merren parasysh kur llogaritni konsumin tuaj total të kafeinës. Kjo është e rëndësishme të merret parasysh, pasi konsumimi i tepërt i kafeinës mund të çojë në efekte anësore si:
- Ndryshimet në ritmin e zemrës dhe presionin e gjakut
- Pagjumësia
- Dhimbje koke dhe marramendje
- Ankthi
- Rritja e stresit
- Dehidratim
Ata me diabet mund të shohin nivele të larta të glukozës me marrjen e rregullt të kafeinës. Kafeina mund të rrisë rezistencën e trupit ndaj insulinës, duke çuar në një sasi më të lartë të glukozës të lëshuar në qarkullimin e gjakut./ Nutrisense
Përktheu për Gazetën Shëndeti, Griselda Ozuni
