Fax news mëson detaje nga testet sereologjike që janë kryer në vendin tonë, kryesisht ndaj personelit mjekësor, që po përballet me Covid 19 në spitalet e vendit. Burime bëjnë me dije se nga të gjithë personat e testuar, rezulton se në spitalin Infektiv 15% e personelit mjekësor e kanë kaluar Covid 19, në spitalin Shefqet Ndroqi 11% dhe te reanimacionet mbi 30%.
Ndërkohë që sipas ekspertëve numri i personave që mund ta kenë kaluar te qytetarët Covidin pritet që të jetë më i vogël, për shkak se ekspozimi i tyre me virusin nuk është aq i madh, sa te bluzat e bardha. Kjo do të thotë se jemi ende shumë larg imunitetit të tufës, që do të bënte që rrezikshmëria e virusit të ishte më e vogël, dhe njerëzit të krijonin antitrupa për ta përballuar atë.
Prej javësh tashmë numri i personave që po rezultojnë me Covid 19 në vendin tonë është shumë i lartë, ashtu si dhe i atyre që kanë nevojë për trajtim spitalor. Vetëm në 24 orët e fundit në vendin tonë dy qytetarë humbën jetën ndërkohë që 90 persona kanë rezultuar pozitiv me Covid.
Sipas MSH-së situata në spitalin infektiv paraqitet serioze, me pacientë që trajtohen në terapi intensive por edhe pacientë të intubuar, një pjesë e tyre mosha të reja. Aktualisht janë të shtruar 81 pacientë në spital, 11 pacientë janë në terapi intensive në gjendje serioze dhe 5 prej tyre janë të intubuar në gjendje të rëndë.
(E.K/Faxweb.al)
/faxweb