Kreu i qeverisë Edi Rama ka deklaruar prerë se nuk është arritur një marrëveshje me Greqinë, për çështjen e detit, dhe për këtë shkak do ti drejtohemi gjykatës ndërkombëtare të Hagës.

Rama tha se Greqia nuk mund ta ushtrojë të drejtën e saj për zgjerimin me 12 milje në kufirin me Shqipërinë, për shkak se mes dy vendeve ka një distancë më të vogël se 24 milje. Ndërkohë që Rama nuk sqaroi se pse lidhur me dështimin e një marrëveshje nuk është njoftuar ende kreu i shtetit.

Keni parë ndonjë hartë që iu buron siguria që zgjerimi me 12 milje i Greqisë nuk e prek zonën e kontestuar mes dy vendeve?

Rama: Tani unë nuk di si ta shpjegoj, por po përpiqem dhe njëherë, nuk është e nevojshme që të shohësh asnjë hartë, pasi e përsëris, 12 miljet janë sipas konventës ndërkombëtare të detit që ushtrohet aty ku është mundësia. Nuk ekzistojnë 24 milje mes nesh dhe Greqisë, pikërisht pse nuk ka çështja zgjidhet me marrëveshje apo përmes gjykatës. 

Hartat që dalin janë fantazira, ato që dalin me vizore dhe ndajnë kufirin deri në Shëngjin janë tollovira, nuk ekzistojnë. Ka një të drejtë që Shqipëria e ka ushtruar që në 1990 dhe është shtrirë deri aty ku është e mundur. Nuk ka marrëveshje mes nesh, në pjesën mes nesh dhe tyre nuk është e mundur shtrirja me 12 milje, dhe për këtë shkak do shkojmë në Gjykatë.

Gjatë ditës së djeshme presidenti Meta, bëri reagimin e parë publik, ku tha se nuk kishte marrë asnjë njoftim zyrtar nga ana e qeverisë për dështimin e marrëveshjes mes dy vendeve, në mënyrë që të shkrihet dhe grupi negociator.

“Deri në këto momente, nuk kam asnjë njoftim apo kërkesë zyrtare, që të sugjerojë ndërprerjen, pezullimin apo përfundimin e procesit të negociatave dypalëshe, nga ekipi negociator apo nga qeveria shqiptare. Për çdo zhvillim, që lidhet drejtpërdrejt apo ndikon në procesin e negociatave për delimitimin e hapësirës detare ndërmjet dy vendeve, kam kërkuar informacion shterues dhe analizë të plotë të qeverisë shqiptare, sipas përgjegjësive, që i takojnë sipas ligjit.

I rikujtoj edhe një herë përfaqësuesve të institucioneve në të gjithë nivelin hierarkik shtetëror, detyrimin dhe përgjegjësinë për përputhshmërinë e plotë të veprimtarisë së tyre kushtetuese dhe ligjore, në shërbim të interesave shtetërore dhe kombëtare.

I siguroj të gjithë qytetarët shqiptarë se do të vijoj të ushtroj me përgjegjësinë maksimale shtetërore dhe kushtetuese detyrat e mia dhe se nuk do të lejoj për asnjë moment të cenohen interesat shtetërore dhe kombëtare të Republikës së Shqipërisë nga cilido individ, që keqpërdor autoritetin e deleguar nga populli shqiptar.

Sipas traditës së vendosur, pasi të vihem në dijeni të plotë të informacioneve të kërkuara zyrtarisht, do të bëj plotësisht transparent vlerësimet dhe qëndrimet e mia në lidhje me të gjitha zhvillimet ndaj kësaj çështjeje”, deklaroi dje Meta.

(E.K/Faxweb.al)

/faxweb

Subscribe kanalin tonë në Youtube për të mos humbur asnjë video të re