“Shërbimet inteligjente amerikane kanë paralajmëruar aleatët e NATO-s, më urgjentisht se kurrë, për një sulm eminent të Rusisë në Ukrainë.“
Kështu e nis shkrimin media e njohur gjermane “Der Spiegel”, e cila shkruan se lufta mund të nisë javën e ardhshme, madje duke bërë të ditur edhe ditën se kur.
“Spiegel” i referohet disa informatave të marra, dalë nga CIA e shërbimet e ushtrisë amerikane, të cilat kanë vënë në dijeni shtetet e NATO-s të premten. Këto informata sekrete thonë se sulmi rus në Ukrainë mund të nisë që të mërkurën e javës së ardhshme.
“Sipas informatave të Spiegel, shërbimet inteligjente e ushtria amerikane, informuan qeverinë gjermane dhe të tjerë aleatë të NATO-s gjatë të premtes, se në bazë të të dhënave të reja, sulmi rus mund të zhvillohet që të mërkurën e javës së ardhshme.
Sipas disa diplomatëve e zyrtarëve ushtarakë, SHBA-të sollën shumë detaje gjatë një mbledhje sekrete. Si përshembull, u përshkruan rrugët specifike të pushtimit rus, e po ashtu edhe njësitë individuale ruse dhe detyrat e tyre. 16 shkurti u përmend si data e mundshme e nisjes së pushtimit”-shkruan “Spigel”.
Përtej këtyre detajeve, Spiegel shkruan se ka disa mendime nga persona të ‘brendshëm’, që besojnë se mund të kemi të bëjmë edhe me përhapjen e një informacioni (nga SHBA), me qëllim “shfryrjen” e ndonjë plani rus për një sulm.
Kujtojmë se një sërë shtetesh anëtare të NATO-s u kanë bërë thirrje këtë shtunë qytetarëve të tyre, që të mos udhëtojnë në Ukrainë, ose nëse ndodhen atje, të largohen sa më parë. Një njoftim i tillë u dha sot edhe nga Ministria e Jashtme e Shqipërisë.
Këshilltari për Sigurinë Kombëtare të SHBA-ve Xhejk Sallivan (Jake Sullivan) u shpreh së fundmi se forcat ruse “janë në një pozicion që i lejon të bëjë një sulm”. Përtej kësaj, ai theksoi se SHBA nuk e di nëse vendimi është marrë (për pushtimin), por sipas të dhënave të grumbulluara, shqetësimi është i justifikuar.
Këtë të shtunë, pritet që Presidenti i SHBA-ve Biden dhe ai i Rusisë, Putin, të zhvillojnë një bisedë telefonike. Putin kërkoi që telefonata të zhvillohej të hënën, tregoi një zyrtar i Shtëpisë së Bardhë, por ka qenë Presidenti i SHBA-ve i cili ka insistuar që biseda të zhvillohet sa më parë, pas të dhënave se Rusia po përgatitet për një pushtim të mundshëm të Ukrainës.
Pavarësisht këtyre të dhënave, Rusia përherë e ka mohuar idenë e një pushtimi të Ukrainës, edhe pse në kufi janë vendosur qindra mijëra forcat ruse.
Të hënën ndërkohë, është parashikuar që kancelari i Gjermanisë Olaf Scholz, të kryejë një vizitë në Ukrainë, ndërsa të martën (për herë të parë), Scholz do të zhvillojë takim me Presidentin rus Putin.
