Të paktën dy persona humbën jetën dhe disa të tjerë u plagosën në një shpërthim pranë një xhamie pranë ndërtesës së Ministrisë së Brendshme në Kabul, kryeqytetin e Afganistanit.
Sipas Abdul Nafi Takor, zëdhënësit të ministrisë, shpërthimi ndodhi në xhaminë jashtë kompleksit të ministrisë.
“Nuk ka asnjë të vërtetë pretendimi se shpërthimi ka ndodhur brenda xhamisë së kompleksit të ministrisë. Ka ndodhur jashtë, ku edhe punonjësit tanë shkojnë për t’u falur”, tha ai në një video-deklaratë.
OJQ-ja Emergjenca në Kabul konfirmoi se shpërthimi vrau dy persona dhe plagosi 20 të tjerë.
“Pas një sulmi me bombë në një xhami në Ministrinë e Brendshme, Qendra Kirurgjike e OJQ-së Emergjenca ka pranuar 20 pacientë – dy ishin tashmë të vdekur në mbërritje. Ky është viktimizimi i dytë masiv që spitali ka trajtuar ditët e fundit, dhe i 23-ti i vitit deri më tani”, tha qendra shëndetësore në Twitter.
Të premten, të paktën 53 njerëz u vranë dhe 110 u plagosën në një sulm vetëvrasës në një qendër arsimore në lagjen Dasht-e-Barchi të Kabulit, vendbanimin e komunitetit etnik shiit Hazara.
Më 23 shtator, një makinë bombë shpërtheu jashtë një xhamie në kryeqytet, duke vrarë të paktën shtatë persona dhe duke plagosur 41 të tjerë, duke përfshirë fëmijë, ndërsa besimtarët po largoheshin pas namazit të xhumasë.
Në muajt e fundit, grupi terrorist DEASH ka intensifikuar aktivitetin e tij në shumë pjesë të vendit, duke paraqitur një kërcënim për sigurinë e talebanëve, të cilët rifituan pushtetin në gusht të vitit të kaluar.
Burimi: AA