Policia ka identifikuar dhe ndaluar drejtuesen e mjetit që përplasi një 7 vjeçare afgane në Shëngjin. 45 vjeçarja që është shoqëruar në polici L. Gj, nën drejtimin e mjetit tip “Fiat Punto”, përplasi vajzën afgane ndërsa po kalonte rrugën pranë hotelit ku po qëndron në Shëngjin.
Njoftimi i policisë:
Rreth orës 16:00, në Shëngjin, në vendin e quajtur ” Te Lapidari”, nga një mjet në lëvizje i cili është larguar menjëherë nga vendi i ngjarjes, është aksidentuar shtetasja e mitur afgane A. F. 7 vjeçe, banuese e përkohshme në Shëngjin, e cila ndodhet në spital për ndihmën e nevojshme mjekësore, aktualisht jashtë rrezikut për jetën.
Falë veprimeve të shpejta hetimore, shërbimet e Policisë Rrugore kanë bërë të mundur identifikimin dhe shoqërimin në ambientet e policisë të mjetit të përfshirë në aksident, konkretisht mjeti tip “Fiat Punto” me drejtuese shtetasen L. Gj. 45 vjeçe, banuese në Shëngjin, ku po kryhen veprimet procedurale.
Gjithashtu, grupi hetimor vazhdon veprimet hetimore për zbardhjen e plotë të rrethanave të aksidentit.
