Presidenti amerikan Joe Biden thotë se ka frikë se Vladimir Putin nuk ka rrugëdalje nga lufta në Ukrainë. Duke folur në Uashington, Biden e përshkroi presidentin rus si “një njeri shumë të komplikuar që nuk ka strategji daljeje”.

“Po përpiqem të kuptoj se çfarë të bëj për këtë”, tha Biden.

Ai shtoi se Putini gabimisht besonte se pushtimi i Ukrainës do të shpërbënte NATO-n dhe Bashkimin Evropian. “Në vend të kësaj, Shtetet e Bashkuara dhe shumë vende evropiane kanë qëndruar në anën e Ukrainës dhe janë bërë më të bashkuar”, tha Biden.

Biden nënshkroi dje një ligj që përshpejton dërgimin e pajisjeve ushtarake në Ukrainë, duke riaktivizuar ligjin e Luftës së Dytë Botërore.

“Ukrainasit po luftojnë për jetën e tyre çdo ditë,” tha Biden në Zyrën Ovale, duke shtuar:

“Kjo luftë është e shtrenjtë, por do të ishte edhe më e shtrenjtë t’i dorëzohesh agresionit.”

Dokumenti i nënshkruar “Ukraine Democracy Defense Lend-Lease Act of 2022” bazohet në një program nga Lufta e Dytë Botërore, qëllimi i të cilit ishte të ndihmonte Evropën t’i rezistonte Hitlerit.

Ai u mbështet nga pothuajse të gjithë përfaqësuesit në Kongres, përveç dhjetë nga Dhoma e Përfaqësuesve që votuan kundër, tha Shtëpia e Bardhë në një deklaratë.

Që nga fillimi i pushtimit rus të Ukrainës, administrata Biden ka dërguar ndihmë ushtarake prej rreth 3.8 miliardë dollarë në Kiev.