Në Gjykata e Posaçme kundër Korrupsionit dhe Krimit të Organizuar po vijon seanca gjyqësore ndaj kryebashkiakut të Vau i Dejës, Kristian Shkreli, i cili akuzohet për korrupsion në zgjedhje. Procesi po zhvillohet me dëgjimin e dëshmitarëve të thirrur nga Prokuroria e Posaçme kundër Korrupsionit dhe Krimit të Organizuar.
Gjatë seancës, dëshmitari Anton Lumi deklaroi se nuk e njeh kryebashkiakun Shkreli, duke treguar se punon si elektricist për linjat elektrike në disa fshatra të Shkodër.
Avokatja e Shkrelit e cilësoi procesin gjyqësor të pabazuar, duke pretenduar se klienti i saj nuk ka kryer asnjë shkelje penale dhe se mbështetja financiare për banorët është dhënë për nevoja komunitare, ndërsa investimet sipas saj janë realizuar nga Operatori i Shpërndarjes së Energjisë Elektrike.
Nga ana tjetër, prokurori i SPAK, Dritan Prençi, kundërshtoi dëshminë e dhënë në sallë, duke deklaruar se dëshmitari Anton Lumi ka dhënë deklarime të ndryshme gjatë fazës së hetimeve paraprake.
“Dëshmitari ka dhënë tjetër deklaratë gjatë hetimit paraprak”, u shpreh Prençi në seancë.
Prokuroria kundërshtoi pjesërisht edhe dëshminë e një tjetër dëshmitari, Klaudio Fusha, duke pretenduar se edhe ai ka ndryshuar deklaratat e tij në krahasim me hetimin.
Një tjetër dëshmitar, i punësuar si elektricist pranë OSHEE-së, deklaroi se mbulon disa fshatra në zonë, por kur u pyet nga SPAK për punime apo remont në linjat elektrike në fshatin Stajkë, ai tha se nuk e mbante mend. Seanca e radhës u caktua me datë 19 maj ora 15:00 pasi prokurorisë i duhet kohë për prova shkresore.
SPAK: A jeni ju në dijeni për ndonjë remont të këtyre linjave në fshatin Stajkë. Në maj 2026 kanë qenë zgjedhjet, a mund ta lidhni nëse keni punuar para apo pas zgjedhjeve?
Dëshmitari: S’e mbaj mend hiç. Mua më çoi shefi im Jetmir Deda për të shtruar një kabull, tetori ka qenë fillimi i punës. Aty kishte dhe vendalinj dhe të OSHEE, kishte edhe elektricistë të tjerë.
SPAK: Ju çfarë pune do bënit?
Dëshmitari: Do shtrija kabull
SPAK: Çfarë problematikash kishte kjo linjë?
Dëshmitari: Nuk e di, nuk kam dijeni.
Avokatët e kryebashkiakut: Kush ju urdhëroi juve të punoni për remont në fshatin Stajkë?
Dëshmitari: Jetmir Deda
Avokatët: Kjo është rutinë?
Dëshmitari: Po po
Avokatët: Kristjan Skrelin a e njeh?
Dëshmitari: As e njoh, as kam folur me të.
Avokatja: Çfarë veprimesh keni bërë atë ditë?
Dëshmitari: Shtroj kabëll me këmbaleca
Avokatja: OSHEE rajoni Shkodër a disponon mjete të tilla me vinç fadromë?
Dëshmitari: Nuk e di, në qendër kam parë si këto mjete.
Avokatët: Duke qenë se prokurori pyet a ka shtrirë apo jo kabllin, dhe ky proces u bë me shtrirje kablli, unë nuk kam pyetje tjetër për dëshmitarin.
SPAK: Kërkoj kundërshtimin e pjesshëm të dëshmisë së dëshmitarit Klaudio Fusha sepse ai ka deklaruar ndryshe gjatë hetimeve paraprake për mjete. Ja lë më çmim gjykatës.
