Gjykata e Vlorës ka lënë në burg 26-vjeçarin Emiljano Lika, i cili u arrestua dy ditë më parë, si skafisti i dyshuar i mjetit gomone që tentoi të kalonte kufirin me 50 sirianë, ngjarje kjo e ndodhur në datën 8 Janar të këtij viti.
Seanca gjyqësore u drejtua nga gjyqtarja Herila Çela dhe prokuror Hyrjet Lamaj, të cilët vlerësuan si të ligjshëm arrestimin e të riut, dhe e lanë atë në burg deri në përfundimin e hetimeve.
Dy javë me parë, Policia ka vënë në pranga dy personat përgjegjës për strehimin e shtetasve të huaj emigrantë, përkatësisht pronarin e një hoteli në Tiranë dhe pronarin e një banese në fshatin Trevllazër, Vlorë.
Rreth 50 emigrantë sirianë u tentuan që të trafikoheshin nga Vlora në drejtim të Italisë, po si pasojë e qendrimit të gjatë në det, varka e tyre pësoi dëmtime, dhe rreth 25 persona pësuan djegie dhe u dërguan me urgjencë në spitalin e Traumës në Tiranë.
Tashmë numri i të arrestuarve për këtë operacion ka shkuar në tre, ndërkohë që Shqipëria prej kohësh është kthyer në një pikë kalimi të emigrantëve nga vendet e lindjes së mesme në drejtim të europës perëndimore.
