Një Boeing 777 i Emirates, i cili u ngrit në Athinë dhe u nis për në Nju Jork, u detyrua të kthehej në Greqi ndërsa kalonte mbi Sardenjë .
Në bord ndodheshin 246 persona (228 pasagjerë dhe 18 anëtarë të ekuipazhit). Alarmi, i nisur nga autoritetet greke, u shkaktua nga raportimi i një të dyshuari në bord. Pas kontrolleve të kryera në të gjithë pasagjerët, policia e vendit ballkanik ka konstatuar se bëhej fjalë për një alarm të rremë .
Avioni, sapo mbërriti në lartësinë e Sardenjës veriore, papritur u kthye mbrapsht, duke ndryshuar kurs për t’u kthyer në Greqi, duke kaluar në itinerarin mbi Siçili. Një alarm I mundshem “rrëmbimi” i avionit i është dërguar të gjithë drejtuesve të sistemeve të radarëve italianë.
Dy avionë luftarakë të Forcave Ajrore u ngritën nga Gioia del Colle, por avioni i kompanisë Emirates pas më shumë se katër orësh lundrim më në fund u kthye në aeroportin e Athinës . Hetimet nga autoritetet aeronautike janë në vazhdim.
Alarmi erdhi tek autoritetet italiane nga kolegë grekë të cilët kishin raportuar praninë në bord të një të dyshuari të mundshëm. Në atë moment fluturimi ishte mbi Sardenjë. Gjatë gjithë kohës që ka qëndruar në hapësirën ajrore italiane, avioni është monitoruar dhe pilotët nuk kanë kërkuar nga autoritetet italiane ulje.
Raporti për shërbimet sekrete të Athinës fliste për një pasagjer të mundshëm të dyshimtë në një fluturim të Emirates, me destinacion Dubai ose Nju Jork. Në momentin e alarmit, fluturimi direkt për në SHBA ishte nisur tashmë, ndërsa tjetri ende nuk ishte nisur. Për këtë arsye, të gjithë pasagjerët e nisur për në Dubai u kontrolluan në terren: pasi nuk u gjet asgjë e dyshimtë, fluturimi u nis me disa orë vonesë. Kontrollet u kryen në avionin e kthyer në një zonë larg terminalit kryesor: një nga pasagjerët u ndalua për kontrolle të mëtejshme. Por edhe në këtë rast nuk u shfaqën elemente të dyshimta ./ Tgcom
