Liderët e vendeve të Ballkanit Perëndimor, po marrin pjesë në një takim informal në Tiranë, të ftuar nga kryeministri, Edi Rama.
Së bashku me komisionerin për Zgjerimin, Oliver Varhelyi, ata do të diskutojne për Procesin e Berlinit që do të zhvillohet në tetor.
Por kryeministri i Kosovës Albin Kurti ka refuzuar të marrë pjesë. Zëdhënësi i Qeverisë, Përparim Kryeziu, tha se Kurti nuk do të jetë në takimin e organizuar nga Rama.
PERPARIM KRYEZIU
ZEDHENESI I QEVERISE SE KOSOVES
“Kurti e ka njoftuar Kryeministrin Rama që nuk do të mund të shkojë kësaj radhe meqë muaj më parë ka konfirmuar pjesëmarrjen në një konferencë në Kretë të Greqisë e ku paneli për Ballkanin Perëndimor është saktësisht në ditën e njëjtë e në kohën e njëjtë”.
Pjesëmarrës në takim janë kryeministrja e Serbisë Ana Bërnabic, kryeministri në detyrë i Malit të Zi, Dritan Abazoviç, kryeministri i Maqedonisë së Veriut, Dimitar Kovaçevski, si dhe kryetarja e Këshillit të Ministrave të Bosnjë-Hercegovinës, Borjana Kristo.
