Lufta brenda llojit nuk është gjithnjë e keqe. I këtij mendimi është ish-presidenti Alfred Moisiu, i cili foli për situatën në Partinë Demokratike.

Në intervistën për gazetaren Elona Gjylmi, ai këshilloi Berishën dhe Bashën që ‘në radhë të parë duhet të mendojnë për vendin e pastaj për veten’.

“Sigurisht politika shqiptare është komplikuar, është lufta brenda llojit, por ndonjëherë këto gjëra bëjnë mirë. Bëjnë mirë sepse edhe brenda llojit duhen hequr ca gjëra që kanë hyrë si kanë hyrë, por tani janë të dëmshme dhe duhen pastruar. Kështu që mendoj se nuk është gjë e keqe”, tha ish-presidenti.

I pyetur se si e sheh rikthimin e Sali Berishës në krye të PD, ish-presidenti tha se çdo njëri ka një periudhë që është aktiv dhe duhet të shërbejë dhe pastaj vjen një moment kur duhet të mënjanohet.

Sipas tij, ajo që po ndodh në PD e dobëson opozitën.

“Por mendoj se pasi kjo të kalojë opozita duhet të bëhet më e fortë dhe do të bëhet më e fortë”, tha Moisiu

Subscribe kanalin tonë në Youtube për të mos humbur asnjë video të re