Presidenti i Azerbajxhanit Ilham Aliyev nuk e ka përjashtuar mundësinë e përdorimit të F-16 turke në rast të një agresioni të jashtëm ndaj Azerbajxhanit.
“Më pyesin shpesh: Çfarë po bëjnë F-16 turq këtu? Jam lodhur nga përgjigjet. Nëse keni satelitë, shikoni, sigurohuni që janë në tokë, jo në qiell. Ata erdhën këtu për të marrë pjesë në stërvitje dhe qëndruan këtu kur vëllezërit tanë turq i lanë ata për shkak të mbështetjes së tyre morale për Azerbajxhanin. Por nëse ka një agresion të jashtëm ndaj Azerbajxhanit, ata do t’i shohin këto F-16 në ajër,” tha Aliyev në një fjalim drejtuar kombit të hënën, në stacionin televiziv shtetëror AzTV.
Siç specifikoi ai, “pesë ose gjashtë” F-16 mbetën në aeroport. Aliyev beson se të gjitha veprimtaritë e Grupit Minsk të OSBE-së kanë për qëllim shpëtimin e Armenisë.
“Sapo filluam të çlironim vendin tonë nga pushtimi, ishim nën presion nga të gjitha palët. Pse Grupi i Minskut nuk arriti të zgjidhë problemin për 28 vjet? Udhëtime, takime, negociata – ne jemi të lodhur nga këto negociata. Për sa kohë mund të negocioni? Ata tani janë përqendruar në shpëtimin e Armenisë”, tha kreu i shtetit të Azerbajxhanit.
Aliyev tha se ai e kishte ngritur vazhdimisht çështjen e sanksioneve kundër Armenisë me bashkë-kryetarët e Grupit Minsk të OSBE-së nëse ata dëshironin të zgjidhnin konfliktin. Sipas tij, fakti që konflikti në Nago-Karabak mbeti i ngrirë për shumë vite, i përshtatej të gjithëve përveç Azerbajxhanit.
“Kjo është pikërisht ajo që dëshironte Armenia – që negociatat të zgjasnin përgjithmonë, që vendet tona të qëndronin nën okupim përgjithmonë,” tha Aliyev.
Udhëheqësi azerbajxhanas tha se vendet bashkëkryesuese kishin mundësinë të “tërhiqnin agresorin në vendin e tij”, por ata nuk donin.
“Ata ishin të kënaqur me situatën në terren, ata u përpoqën të na detyronin ta pranonim atë. Por ne kemi ndryshuar realitetin dhe kjo duhet të merret parasysh,” shtoi Aliyev.
Ai gjithashtu tha se urdhëroi forcat e armatosura të Azerbajxhanit të mos u nënshtrohen provokimeve dhe të mos iu përgjigjen shkeljeve të fundit të armëpushimit të palës armene.
“Ne do të vazhdojmë luftën tonë. Nëse ata duan një armëpushim, le t’i thonë Armenisë të largohet nga territoret tona. Nëse kjo nuk do të ndodhë, ne do të shkojmë deri në fund,” tha Aliyev.
Aliyev tha se vendi i tij nuk është kundër mbajtjes së një takimi të ministrave të jashtëm azerbajxhanas dhe armenë të planifikuar për në 29 tetor në Gjenevë, por negociatat nuk duhet të jenë të pakuptimta.
“Pas bisedimeve në Shtetet e Bashkuara, u vendos që të mbahej një takim i ministrave të jashtëm të Azerbajxhanit dhe Armenisë në Gjenevë. Nuk e kam problem, le të takohen. Pra, kaq shumë takime të pakuptimta janë mbajtur në këto 28 vjet, kështu që një më shumë se një më pak…Jo, unë nuk dua të them se ky takim është gjithashtu i pakuptimtë. Ne duam që ai të ketë kuptim, kështu që këto negociata do të përshpejtojnë zgjidhjen e konfliktit,” tha Aliyev.
