Në një lidhje direkte për RTK-në nga Slavonski-Brod (Kroaci), ambasadori i Kosovës në Kroaci Gëzim Kasapolli, u shpreh se në bordin e autobusit që u aksidentua kishte 13 fëmijë. Fatmirësisht, asnjëri prej tyre nuk është në listën e 10 personave që ndërruan jetë.
“Për momentin ndodhem në spitalin e Slavonski Brodit. Këtu për momentin janë 44 persona që kanë kërkuar ndihmë mjekësore, 8 prej të cilëve janë në gjendje të rëndë. Disa prej tyre tashmë e kanë kryer operimin dhe gjendja e tyre është stabile”, ka thënë ambasadori Kasapolli.
Ambasadori tregoi se i ka vizituar të gjithë të lënduarit që ndodhen në spital dhe se ka nisur puna për identifikimin e viktimave dhe të plagosurve.
“Ne e kemi listën e të gjithë pasagjerëve dhe së bashku me autoritetet kroate jemi duke i identifikuar secilin veç e veç. Por disa janë në terapi dhe ende nuk kemi arritur të bëjmë identifikimin e tyre”, -tha ambasadori.
“Sipas informatave që kemi kanë qenë diku 13 fëmijë në autobus dhe fatmirësisht asnjë prej tyre nuk është në listën e të vdekurve. Tani jemi duke e bërë studimin e moshës dhe identifikimin e tyre dhe posa ta kemi këtë informatë do ta ndajmë me opinionin”, shtoi Kasapolli.
Në lidhje me shkaqet e aksidentit, ambasadori tha se për momentin nuk ka qëndrim zyrtar nga autoritetet kroate.
