Amnesty International tha se Izraeli po zbaton një regjim institucional dhe “aparteid” sistematik kundër palestinezëve, duke theksuar se “Izraeli, i cili ka kryer këtë krim kundër njerëzimit, duhet të mbajë përgjegjësi”.
Sekretarja e Përgjithshme e Amnesty International, Agnes Callamard, në një konferencë shtypi në Kudsin Lindor të pushtuar me pjesëmarrjen e zyrtarëve të tjerë të agjencisë, njoftoi raportin e saj prej 280 faqesh të titulluar “Regjimi aparteid i Izraelit: Diskriminimi racor kundër palestinezëve dhe krimet kundër njerëzimit”.
Callamard tha se raporti zbulon dimensionet e vërteta të regjimit të aparteidit të Izraelit.
Callamard theksoi se palestinezët “trajtohen si një grup racor inferior dhe sistematikisht i privuar nga e drejta” në Gaza, Bregun Perëndimor të pushtuar, Kudsin Lindor dhe kudo që ata jetojnë, përfshirë edhe në Izrael.
Në të gjitha zonat nën kontrollin e Izraelit ku praktikohet qartë aparteidi zbatohen politika të ndarjes hapësinore, shpronësimit dhe përjashtimit, tha Callamard, duke i kërkuar bashkësisë ndërkombëtare të ndërmarrë veprime.
“Një sistem i ndërtuar rreth ekspozimit të miliona njerëzve ndaj shtypjes raciste të institucionalizuar dhe afatgjatë nuk mund të justifikohet në asnjë mënyrë. Nuk ka vend për regjimin aparteid në botën tonë. Shtetet që zgjedhin të jenë simpatike ndaj Izraelit do ta gjejnë veten në anën e gabuar të historisë. Shtetet që vazhdojnë të furnizojnë Izraelin me armë dhe e mbrojnë atë nga përgjegjësia në OKB, minojnë rendin juridik ndërkombëtar, duke forcuar sistemin e aparteidit dhe duke përkeqësuar më tej vuajtjet e popullit palestinez”, tha Callamard.
Në raportin hulumtues të Amnesty International, i cili detajon sistemin e shtypjes dhe dominimit që Izraeli ushtron kundër palestinezëve në të gjitha fushat ku kontrollon të drejtat e palestinezëve, nënvizohet se “krimi i aparteidit” është mjaft i gjerë, ku përfshin Izraelin dhe të pushtuarit, territoret palestineze, si dhe palestinezët që janë zhvendosur dhe janë strehuar në vende të tjera.
Në raport theksohet se praktika të tilla si konfiskimi masiv i tokave dhe pronave palestineze, zhvendosja e detyruar, vrasjet e paligjshme, kufizimet e tepërta të lëvizjes dhe privimi i shtetësisë janë elementë të një sistemi që bie në sferën e aparteidit sipas ligjit ndërkombëtar.
