Vlerësohet se 1.56 miliardë maska mbrojtëse anti-COVID kanë përfunduar këtë vit në oqeanet në të gjithë botën, e cila ka pasoja të rënda për florën dhe faunën detare, sipas një raporti nga organizata jo-qeveritare me bazë në Hong Kong për mbrojtjen e detit.
Një raport nga OceansAsia thotë se bota detare është e ndotur me një shtesë prej 4,680 deri në 6,240 ton plastikë për shkak të maskave të hedhura në mënyrë jo të duhur.
Pandemia ka rritur ndjeshëm konsumin e plastikës njëpërdorimshme, ndërsa politikat miqësore me mjedisin kërcënohen, thuhet në raport.
“Shqetësime më të mëdha për higjienën personale dhe blerjet më të shpeshta të ushqimit katering kanë sjellë rritjen e përdorimit të plastikës, veçanërisht paketimit plastik,” tha Gary Stokes, drejtori i operacioneve në OJQ OceansAsia.
Ai shton se “ndërkohë, një numër masash që synojnë uljen e konsumit plastik, të tilla si ndalimi i qeseve plastike të disponueshme” janë shtyrë ose refuzuar për momentin.
Vdekje për jetën ujore
Raporti thekson se dekompozimi i maskave mbrojtëse zgjat sa 450 vjet, gjatë së cilës kohë mikroplastikat mund të dëmtojnë ndjeshëm botën detare dhe ekosistemet.
“Si rezultat i ndotjes plastike, rreth 100,000 gjitarë detarë dhe breshka, më shumë se një milion zogj, madje edhe një numër i madh peshqish, joverthorë dhe kafshë të tjera vdesin çdo vit,” tha Stokes i OceansAsia.
“Procesi ka një ndikim jashtëzakonisht negativ në peshkimin dhe industrinë e turizmit dhe i kushton ekonomisë globale rreth 13 miliard dollarë në vit.”
Propozimi
Raporti propozon përdorim më të shpeshtë të maskave mbrojtëse të ripërdorshme dhe u bën thirrje qeverive për të përshpejtuar zhvillimin e llojeve alternative të maskave, si dhe për të edukuar dhe informuar publikun për asgjësimin e duhur të mbeturinave.
“Eshtë thelbësore që të angazhohemi për të minimizuar përdorimin e plastikës njëpërdorimshme, dhe të gjithë duhet të marrim pjesë në të njëjtën mënyrë”, tha Teale Phelps Bondaroff, drejtor i kërkimit në OceansAsia.
