Ministri turk i Mbrojtjes Hulusi Akar tha të enjten se një përpjekje për të larguar Turqinë nga programi i avionëve luftarakë F-35 do të minonte aftësinë e mbrojtjes së NATO-s.
Në prag të një takimi të ministrave të Mbrojtjes të NATO-s në Bruksel, ai foli me homologun e tij amerikan Marc Esper, si dhe me Përfaqësuesin Special të SHBA-ve për Sirinë, James Jefrey.
Akar nga ana tjetër tha se blerja e sistemit rus të mbrojtjes S-400 tashmë është përfunduar.
Por ministri turk paralajmëroi se përpjekja për të hequr Turqinë nga programi F-35 nuk është në interes të vendit të tij, as të aleancës së NATO-s.
“Turqia nuk është vetëm blerëse e avionit F-35, Turqia është një nga investitorët dhe partnerët në këtë program”, shpjegoi Akar.
Ai shtoi se ishte një marrëveshje biznesi, e cila rrjedh nga të drejtat e vendit të tij, e që Turqia do ta mbrojë deri në fund.
Pasi dështoi të negociojë blerjen e sistemit Patriotit nga SHBA, Turqia vendosi në 2017 për të blerë një sistem të sofistikuar të mbrojtjes S-400 nga Rusia.
Por një veprim i tillë nga Ankaraja shkaktoi mosmiratim të Uashingtonit.
Një sërë zyrtarësh ushtarakë dhe analistë të SHBA po kërkojnë që Shtetet e Bashkuara të mos i dorëzojnë Turqisë avionët luftarakë F-35 nëse Ankaraja merr S-400 rusët.
Akar tha më parë se blerja e sistemit të mbrojtjes ruse S-400 për Turqinë nuk ishte çështje zgjedhjeje, por më tepër një nevojë.