Kreu i Grupit Parlamentar të opozitës, Gazment Bardhi, ka komentuar vizitën e Sekretarit amerikan të Shtetit, Antony Blinken në Tiranë, si dhe takimet e tij me përfaqësuesit e drejtësisë.
Bardhi është shprehur se takimin e Blinken me përfaqësuesit e drejtësisë, e sheh si një inkurajim për to, për të çuar më tej Reformën në drejtësi.
“E shoh si inkurajim për institucionet e drejtësisë për të çuar para Reformën në drejtësi. Nxitje për të zbatuar ligjin e për të vijuar me punë korrekte. Ne nuk kemi betejë me institucionet e drejtësisë, duhet t’i nxisim të zbatojnë ligjin. Ka raste kur devijojnë nga ligji apo gabojnë por kjo duhet parë rast pas rasti”, tha Bardhi, në studion e News24.
Ndër të tjera ai theksoi se kjo “është një vizitë e mirëpritur që konfirmon partneritetin dhe miqësinë e veçantë me SHBA. Roli i SHBA për faktorin shqiptar në rajon, i rëndësishëm”.
Sa i përket bashkëpunimit me Berishën, në një kohë që ish-kryeministri është “non grata” në SHBA, Bardhi tha se brenda PD ka diversitet mendimi ndërsa shtoi se nuk ka sulm ndaj SHBA.
“Nuk ka sulm ndaj SHBA. Dihet problemi i tij me SHBA por nuk ka sulm apo atakim ndaj SHBA. Vijojnë të mbeten partnerët tanë strategjikë. Jemi bashkuar në diversitet dhe askush nuk i imponon mendimin askujt.
Kjo është një vlerë e shtuar në parti. Në PD mund të ndajmë mendime të ndryshme por gjërat që na bashkojnë janë më shumë se ato që na ndajnë”, tha ai.