Arabia Saudite po përdor teknologji inteligjente dhe platforma të drejtuara nga inteligjenca artificiale për të ofruar shërbime për gati dy milionë pelegrinë gjatë Haxhit të këtij viti, raportoi Agjencia Anadolu. Agjencia turke deklaroi gjithashtu se autoritetet e këtij vendi prezantuan një seri shërbimesh dixhitale inteligjente.
Një nga këto shërbime është Manarah 2, një robot i bazuar në inteligjencën artificiale që komunikon në më shumë se 20 gjuhë dhe ofron informacion dhe ndihmë në kohë reale për pelegrinët në vendet kyçe.
Ekzistojnë gjithashtu kartat Nusuk, të cilat u lejojnë besimtarëve të rezervojnë takime për të vizituar varrin e Profetit në Xhaminë e Profetit në Medine. Me këto karta, pelegrinët kanë gjithashtu qasje në informacionin e tyre të kontaktit dhe detajet e akomodimit, gjë që ndihmon në zvogëlimin e numrit të njerëzve që humbasin rrugën.
Qendra e Itinerarit të Autobusëve të Mekës, e pajisur me teknologji inteligjente punon në bashkëpunim me platformën Nusuk dhe platformën inteligjente Arshidni për të siguruar shërbime transporti të sigurta dhe të sakta dhe mbërritjen e pelegrinëve në akomodimin e tyre.
Informacion për shëndetin dhe transportin
Aplikacioni Taëakkalna, një aplikacion shëndetësor celular, i informon pelegrinët për gjendjen e tyre shëndetësore dhe ofron qasje në shërbimet e nevojshme mjekësore.
Arabia Saudite po prezanton gjithashtu Smart Enrichment Assistant, një aplikacion inovativ që i informon vizitorët në shumë gjuhë rreth një numri shërbimesh të dobishme, duke përfshirë kohët e namazit dhe vendet e leksioneve fetare.
Autoritetet e Arabisë Saudite gjithashtu lançuan iniciativën “Rruga e Mekës”, një shërbim me cilësi të lartë që thjeshton procedurat e udhëtimit për pelegrinët edhe në vendet e tyre të origjinës dhe mundëson përfundimin e lehtë dhe efikas të formaliteteve në pikën e nisjes.
Është lançuar gjithashtu një sistem kodimi dhe renditjeje bagazhesh për të lehtësuar trajtimin e bagazheve në aeroporte dhe dorëzimin në akomodimin e pelegrinëve në Mekë ose Medinë.
Ekzistojnë gjithashtu aplikacione mobile për mësimin e faljes së namazit për fillestarë, si dhe mësimin përmendësh të Kuranit, të cilat kontribuojnë në një përvojë më të thellë shpirtërore të pelegrinazhit, sipas Anadolia-s. /tesheshi.com/
