Policia e Shtetit ka shpërndarë një urdhër për të gjithë drejtoritë rajonale të Policisë, përmes të cilit u kërkon vigjilencë dhe ndërmarrjen e operacioneve për arrestimin e personave në kërkim, e kryesisht të atyre që merren me trafik klandestinësh nga vendet arabe.
Kësisoj, Policia e Vlorës ka arrestuar një person të shpallur në kërkim për dhënie ndihme për kalim të paligjshëm të kufirit”. Seksioni për Hetimin e Trafiqeve dhe Narkotikëve pranë DVP Vlorë, në bazë të informacioneve të siguruara në rrugë operative, ka bërë lokalizimin e vendndodhjes dhe kapjen e shtetasit në kërkim B. B., 45 vjeç, banues në Vlorë.
Policia e Vlorës ka bërë kapjen e këtij shtetasi në lagjen “15 Tetori” Vlorë, pasi Gjykata e Kavajës i ka caktuar masën e sigurisë “Arrest në burg”, për veprën penale “Dhënie ndihme për kalim të paligjshëm të kufirit shtetëror”, kryer në bashkëpunim, mbetur në tentativë.
Disa muaj më parë, shtetasi B. B., në bashkëpunim me dy persona të tjerë, ka tentuar të kalojë me skaf, në mënyrë të paligjshme nga Kavaja drejt Italisë, 18 shtetas që kishin hyre ilegalisht në Shqipëri. Materialet iu referuan Prokurorisë, për veprime të mëtejshme.
