Ministri i Brendshëm, Taulant Balla ka përshëndetur operacionet antikanabis në disa zona të vendit ku janë asgjësuar mijëra bimë narkotike.
Me anë të një postimi në rrjetet sociale, Balla thotë se “presim më shumë goditje si këto”.
“Përgëzime Policisë së Shtetit për goditjet e mbrëmshme kundër kultivimit të bimëve narkotike në Shkodër, Malësi e Madhe, Vau i Dejës, Lezhë dhe Krujë, ku janë asgjësuar 6210 bimë narkotike. Presim më shumë goditje si këto”, shkruan Balla.
Kujtojmë që orët e fundit në disa zona në veri të vendit janë asgjësuar me anë të djegies mijëra bimë kanabis sativa.
Në Krujë gjatë fazës së 28 të operacionit “Territor i pastër” u asgjësuan nëpërmjet djegies 875 bimë narkotike cannabis sativa që u gjetën të kultivuara në terren malor.
Ndërkohë në qarkun e Shkodrës u asgjësuan në total 3491 bimë narkotike cannabis sativa, prej të cilëve: 304 bimë në Pult dhe Theth, Shkodër; 1021 bimë në fshatin Rrapsh, Malësi e Madhe; 2166 bimë në fshatrat Shllak dhe Temal, Vau i Dejës.