Në mbledhjen e sotme të kryesisë së Partisë Demokratike është propozuar që në strukturat qendrore të mos ketë individë non grata. Propozimi është bërë nga nënkryetari i PD Enkelejd Alibeaj.
Deputetja Dhurata Çupi e ka cilësuar këtë si një qëndrim ndaj ish-kryeministrit Sali Berisha. “Kjo është për Sali Berishën. Ta themi qartë dhe shqip. A jemi në gjendje të përballojmë këtë ndaj demokratëve?”, ka deklaruar ajo.
Disa nga deputetët e pranishëm në mbledhje mes të cilëve Kreshnik Çollaku, Ori Nebiaj dhe Agron Gjekmarmakaj kanë dhënë dakordësinë e tyre për propozimin e Alibeajt.
Në mbledhje është propozuar ngritja e Komisionit të përhershëm Statutor, anëtarët e së cilës do të jenë Enkelejd Alibeaj, Jorida Tabaku, Ervin Salianji, Kreshnik Çollaku, Taulant Zeneli, Jonila Godole.
Kuvendi Kombëtar i PD i thirrur nga kryedemokrati Lulzim Basha pritet të nisë punimet nesër në orën 11:00 në Pallatin e Kongrese. Ndërkohë nga ana tjetër, kampi tjetër demokrat që drejtohet nga Berisha ka organizuar referendum në çdo degë të PD për shkarkimin e Lulzim Bashës nga posti i kryetarit.
