Presidenti Bajram Begaj, përshëndeti hapjen e grup-kapitullit të gjashtë të negociatave për anëtarësimin e Shqipërisë në Bashkimin Evropian, vendim i marrë sot në Konferencën e Tretë Ndërqeveritare Shqipëri-BE, të mbajtur në Bruksel.
Përmes një postimi në rrjetin social “X”, presidenti Begaj vlerëson se një vendim i tillë afron hyrjen e Shqipërisë në Bashkimin Evropian.
Mesazhi i plotë i Presidentit të Republikës i përcjellë në profilin zyrtar në rrjetet sociale:
“Përshëndesim hapjen e negociatave për grup-kapitullin e gjashtë.
Vendimi i sotëm dëshmon për ecurinë e sigurt të Shqipërisë drejt anëtarësimit në një të ardhme të afërt në BE”.
We welcome the opening of negotiations on Cluster Six.
Today’s decision affirms Albania’s solid progress towards EU membership in the near future.
🇦🇱🇪🇺
— Bajram Begaj (@BajramBegajAL) December 17, 2024
Këshilli Evropian miratoi sot konkluzionet për zgjerimin e BE-se që mbulojnë gjashtë vendet e Ballkanit Perëndimor.
Në konkluzionet për Shqipërinë, Këshilli mirëpriti hapjen e grup-kapitujve “Themeloret” në në konferencën e dytë ndërqeveritare më 15 tetor 2024 dhe hapjen e grup-kapitujve “Marrëdhëniet e Jashtme”.
Këshilli vlerëson objektivin e qeverisë për të vazhduar progresin e Shqipërisë në rrugën e saj drejt BE-së, nxit të gjitha forcat politike të ndjekin planin e tyre ambicioz për mbylljen e negociatave të anëtarësimit dhe pret të jetë në gjendje të hapë grupe të mëtejshme negociuese sa më shpejt të jetë e mundur, pas plotësimit të kushteve.
Duke vënë në dukje se polarizimi politik vazhdon të ndikojë në aktivitetet e parlamentit, Këshilli Evropian rikujton se dialogu politik gjithëpërfshirës dhe konstruktiv në vend mbetet vendimtar për progresin në reformat që kanë të bëjnë me BE-në.