Numri dy i Partisë Socialiste, njëkohësisht kryetar i grupit parlamentar të kësaj partie, Taulant Balla, ka marrë pjesë në mbledhjen e Asamblesë së Zgjeruar Socialiste në Berat.
Berati për socialistët është një ndër bashkitë që ata synojnë ta rimarrin.
Kjo, pasi aleanca e tyre e zgjedhjeve vendore të vitit 2015, bëri që ky bastion i të majtëve t’i lihet zonë e lirë ish-aleatit të dikurshëm.
“Në katër vitet e ardhshme, ne do të vijojmë transformimin e Beratit. Dhe këtë do ta bëjmë me kandidatin tonë, Ervin Demon, i cili në zgjedhjet lokale të qershorit do të zgjidhet kryebashkiak i Beratit, me votat jo vetëm të socialistëve, por të gjithë qytetarëve beratas.” – ka thënë Balla gjatë fjalës së tij.
Gjithashtu, ai ka folur për Reformën në Drejtësi, e cila, sipas tij, do të vijojë, pavarësisht pengesave të opozitës.
Në fund të fjalës Balla ka theksuar edhe një herë vendosmërinë e socialistëve për të vijuar me zgjedhjet lokale të radhës, ato të 30 qershorit, dhe u ka bërë thirrje socialistëve të Beratit të mobilizohen dhe të mbështesin kandidatin e tyre në këto zgjedhje.
Nga ana e tyre strukturat e Partisë Socialiste në Berat duket se e kanë pritur me entuziazëm kandidaturën e Demos për zgjedhjet lokale të 30 qershorit, gjë që dukej në pjesëmarrjen e tyre të madhe në takim dhe në ovacionet mbështetëse sa herë që përmendej emri i tij.
Balla në këtë takim shoqërohej nga deputetët Niko Peleshi dhe Evis Kushi së bashku me deputetët e Beratit, Blendi Klosi, Ermonela Felaj, Adnor Shameti dhe Fadil Nasufi./ beratinews
