Kryetari i Grupit Parlamentar të Partisë Socialiste Taulant Balla ka kujtuar sot Ditën e Çlirimit të Librazhdit.
Balla shigjetoi Berishen duke u shprehur se ata që kanë sulmuar LANÇ për 30 vite me radhë, sot janë në listën e atyre që sulmojnë dhe tentojnë të bëjnë pis luftën çlirimtare të UÇK.
“Ndërsa sot kujtojmë Luftën Antifashiste Nacional Çlirimtare, duhet të themi se gjatë 30 viteve të fundit ka patur përpjekje për të hedhur baltë mbi këtë epope historike të kombit tonë.Nuk është e rastësishme sot që ata që kanë sulmuar LANÇ për 30 vite me radhë, sot janë në listën e atyre që sulmojnë dhe tentojnë të bëjnë pis luftën çlirimtare të UÇK.Nuk është e rastësishme që tradhëtari epik i Shqipërisë Sali Berisha, shan dhe hedh baltë njëlloj edhe ndaj LANÇ dhe ndaj UÇK.SHQIPËRIA nuk do të ndalet së luftuari për pastërtinë e luftës çlirimtare të Kosovës dhe rishikimin e Rezolutës së Këshillit të Europës bazuar në një raport famëkeq, mbështetur dhe sponsorizuar haptazi nga Kremlini dhe rublat ruse”, është shprehur Balla.
Gjithashtu Balla ka theksuar edhe njëherë situatën me të cilën po përballet vendi ynë për shkak të inflacionit të luftës.
“Ne sot kujtojmë Ditën e Çlirimit të Librazhdit, por ne sot po përballemi me një luftë, luftën e Vladimir Putin kundër Ukrainës, Europës dhe Demokracisë. Pikërisht prandaj, sot më shumë se kurrë kërkohet të jemi të bashkuar, për të marrë vendimet e duhura për të mbrojtur Shqipërinë dhe shqiptarët. Njësoj siç bëmë me tërmetin dhe pandeminë. Por, fatkeqësisht, e djathta/opozita e rublave me nongratat e veta, është duke bërë çdo gjë për të përçarë shqiptarët, pikërisht tani kur kërkohet bashkim dhe shumë punë e përbashkët.Ne e dimë se inflacioni i luftës se Putinit prek çdo familje shqiptare, si kudo në Europë. Ne jemi duke bërë më të mirën e mundshme, në kushtet kur askush nuk e di se sa gjatë kjo luftë do të vazhdojë. Duhet të jemi të përgatitur jo vetëm për të tashmen, por për të ardhmen”, tha Balla.
