Pas përpjekjeve të shumta të familjarëve të tij, avokatit, por edhe shtetit shqiptar, Ballist Morina më në fund i ka shpëtuar ekstradimit në Serbi.
Prej një viti, Ismail Morina, tifozi shqiptar që ngriti flamurin e Shqipërisë së Madhe në stadiumin e Beogradit në 2014-ën gjatë ndeshjes famëkeqe Serbi-Shqipëri, mbahej në burg në Zagreb të Kroacisë, pas një urdhërarresti të lëshuar nga Serbia me akuzën e nxitjes së urrejtjes midis popujve.
Por ditën e djeshme, tifozi i famshëm është dërguar në Itali, ku ai është rezident prej disa vitesh, duke qenë se edhe bashkëshortja e tij është italiane.
Gjyqi ndaj tij do të vijojë në Itali, duke eleminuar kështu mundësinë për kërkimin e azilit në Kroaci, që ishte sugjerimi i parë i avokatit të tij për të shpëtuar nga ekstradimi në Serbi, ku nuk dihej ç’mund të ndodhte me të.
